დღეს, 23 აპრილს, თურქეთში, ქალაქ სტამბოლში 6,2 მაგნიტუდის სიმძლავრის მიწისძვრა მოხდა. თურქეთის მთავრობამ ინფორმაცია გაავრცელა 151 დაშავებულისა და დღის განმავლობაში განვითარებული, კიდევ 50-ზე მეტი ე.წ. აფტერშოკის [შედარებით მცირე სიმძლავრის მიწისძვრის] შესახებ.
სტამბოლის გუბერნატორის ცნობით, მიწისძვრით გამოწვეული პანიკის შედეგად, სულ მცირე 151 ადამიანი დაშავდა სიმაღლიდან გადახტომის შედეგად. მსხვერპლის შესახებ ინფორმაცია არ გავრცელებულა.
გარდა ამისა, BBC იუწყება, რომ სტამბოლში, ფატიჰის რაიონში ერთი მიტოვებული შენობა ნაწილობრივ დაინგრა.
მიწისძვრა მარმარილოს ზღვაში, სტამბოლის დასავლეთ გარეუბანთან, ადგილობრივი დროით 12:49 საათზე მოხდა.
თურქეთის კატასტროფებისა და საგანგებო სიტუაციების მართვის სამსახურის ცნობით, მიწისძვრის ეპიცენტრი სტამბოლიდან დასავლეთით, დაახლოებით 80 კილომეტრში, დაახლოებით 7 კმ-ის სიღრმეზე იყო.
პირველი ბიძგი 12:13 წუთზე დაფიქსირდა და 3,9 მაგნიტუდის სიმძლავრე ჰქონდა. შემდეგი, უძლიერესი, 12:49 საათზე მოხდა. მას მოჰყვა კიდევ რამდენიმე ბიძგი, 4,4-დან 4,9 მაგნიტუდამდე.
________________________
ფოტოზე: 6.2 მაგნიტუდის სიმძლავრის მიწისძვრის შემდეგ სტამბოლელების ნაწილი პარკებსა და სკვერებში რჩება ოჯახებით, შინაური ცხოველებითა და საჭირო ნივთებით. ბევრ მათგანს ეშინია შენობაში შესვლა. ფოტო: ევროპის პრესფოტო სააგენტო. EPA-EFE/TOLGA BOZOGLU
