ბათუმში ქალაქის მერია ტროტუარზე ფილებისა და ბორდიურების შეცვლას გეგმავს იმ ადგილზე, სადაც უკვე 139 დღე უწყვეტი პროევროპული საპროტესტო აქცია იმართება.
სამუშაოებზე გამოცხადებული ტენდერი უკვე მესამედ დასრულდა უარყოფითი შედეგით, მორიგი ხელახალი ტენდერი კი მერიის სამმართველოს ჯერ არ გამოუცხადებია.
ბათუმში პროევროპული საპროტესტო აქცია საკონსტიტუციო სასამართლოსთან 2024 წლის 28 ნოემბრიდან ყოველდღე იმართება.
ტროტუარზე ფილებისა და ბორდიურების შეცვლაზე პირველ ტენდერში წინადადებების მიღება 2024 წლის 20 დეკემბერს დასრულდა, თუმცა, ტენდერში მონაწილე ერთადერთ კომპანიას, „ფირმა იმედს“, საქალაქო ინფრასტრუქტურისა და კეთილმოწყობის სამმართველომ დისკვალიფიკაცია მისცა.
სამმართველოს სატენდერო კომისიის ოქმში აღნიშნულია, რომ შპს „ფირმა იმედმა“ არ წარმოადგინა სატენდერო კომისიის მიერ დადგენილ ვადაში გარანტია, შემდეგი ფორმის დაცვით: დაბეჭდილი გარანტიის გამცემი დაწესებულების ტიტულიან ფურცელზე [ბლანკი], ხელმოწერილი უფლებამოსილი პირის მიერ და ბეჭედდასმული, რაც წარმოადგენს დისკვალიფიკაციის საფუძველს.
ტენდერი 319 ათას 887 ლარით იყო გამოცხადებული. „ფირმა იმედი“ კი მომსახურებას მერიის სამმართველოს 307 ათას 777 ლარად სთავაზობდა.
ხელახალი ტენდერი იმავე თანხით მერიის სამმართველომ 2025 წლის 15 იანვარს გამოაცხადა. ამ ტენდერში ერთადერთი პრეტენდენტი იყო შპს „ესაია ჯგუფი“, რომელიც მომსახურებას 296 ათას 670 ლარად სთავაზობდა. ამ კომპანიას დისკვალიფიკაცია ტექნიკური დოკუმენტაციის გამო მისცეს.
მესამედ ტენდერი მერიის საქალაქო ინფრასტრუქტურისა და კეთილმოწყობის სამმართველომ 2025 წლის 10 მარტს გამოაცხადა იგივე თანხით – 319 ათას 887 ლარი. მონაწილეობა აქაც მხოლოდ ერთმა კომპანიამ მიიღო, ამ შემთხვევაში ეს იყო შპს „ბენ-სი გრუპი“, რომელიც მომსახურებას სამმართველოს 315 ათას ლარად სთავაზობდა. სამმართველომ ამ კომპანიასაც დისკვალიფიკაცია ტექნიკური დოკუმენტაციის გამო მისცა.
აღნიშნული ტენდერის ფარგლებში უნდა შესრულებულიყო შემდეგი სამუშაოები:
- „დემეტრე თავდადებულის N10-ის მიმდებარედ ტროტუარის მოწყობა;
- ნონეშვილის ქ.N1-დან N6-მდე ტროტუარის მოწყობა;
- მემედ აბაშიძის ქუჩაზე ტროტუარის კეთილმოწყობა ნიკოლოზ ბარათაშვილის კვეთიდან კონსტანტინე გამსახურდიას ქუჩის კვეთამდე და კონსტანტინე გამსახურდიას ქუჩაზე ტროტუარის კეთილმოწყობა ეგნატე ნინოშვილის ქუჩის კვეთამდე“.
ვრცლად ამ სამუშაოების შესახებ ნახეთ ამ ბმულზე:
ბათუმის მერია ტროტუარზე ფილების შეცვლას გეგმავს იქ, სადაც 104 დღეა აქცია იმართება
_________________________________
მთავარი ფოტოზე: პროევროპული უწყვეტი პროტესტის 138-ე ღამე ბათუმში, საკონსტიტუციო სასამართლოსთან
