ბრიტანული დაზვერვის ცნობით, უკრაინაში დაახლოებით 200-250 ათასი რუსი სამხედრო დაიღუპა, ხოლო დაღუპული და დაჭრილი რუსი სამხედროების საერთო რაოდენობა დაახლოებით 900 ათასია.
ამის შესახებ დიდი ბრიტანეთის თავდაცვის სამინისტრო დღეს, 20 მარტს, სოციალურ ქსელ X-ზე წერს ბრიტანული დაზვერვის ანგარიშზე დაყრდნობით.
უწყების ცნობით, ეს არის რუსეთის ყველაზე დიდი დანაკარგი მეორე მსოფლიო ომის შემდეგ.
ბრიტანული დაზვერვა აღნიშნავს, რომ რუსეთის ღარიბი რეგიონებიდან ეთნიკურ უმცირესობებს შორის დანაკარგები გაცილებით მეტია, ვიდრე დიდი ქალაქების მცხოვრებთა შორის.
რუსეთის ხელისუფლება დაღუპულებისა და დაჭრილების შესახებ ოფიციალურ მონაცემებს არ ავრცელებს.
რაც შეეხება უკრაინის დანაკარგებს, უკრაინის პრეზიდენტმა ვოლოდიმირ ზელენსკიმ 2025 წლის თებერვალში განაცხადა, რომ 2022 წლის თებერვლიდან ბოლო დრომდე რუსეთ-უკრაინის ომში 45 100 უკრაინელი ჯარისკაცი დაიღუპა და 390 000 დაიჭრა.
