პროევროპული აქციების 9 მონაწილის პროცესი ბათუმის საქალაქო სასამართლოში ხვალ, 6 მარტს გაიმართება.
საუბარია სხვადასხვა საპროტესტო აქციაზე, მათ შორის 31 იანვრის აქციაზე, როცა პოლიციელებმა თქვეს, რომ აქციის მონაწილეები „არასაკმარისი რაოდენობის“ გამო ქუჩას ვეღარ გადაკეტავდნენ და აქტივისტებმა მოძრაობა ზებრა გადასასვლელზე დაიწყეს. „ზებრა გადასასვლელით სარგებლობის საქმეზე“ ბათუმის სასამართლოში სულ 26 პირი დაიბარეს, მათ შორის 5 მოქალაქის პროცესი ხვალაა ჩანიშნული.
ადმინისტრაციულ პასუხისგებაში მიცემული პირების ინტერესებს სასამართლოში საია იცავს.
სასამართლოში დაბარებულ აქციის მონაწილეებს ადმინისტრაციული კოდექსის 174-ე მუხლის მეოთხე ნაწილით ედავებიან – „სასამართლოს შესასვლელის ბლოკირება, შეკრების ან მანიფესტაციის მოსამართლის საცხოვრებელ ადგილას ან საქართველოს საერთო სასამართლოში ჩატარება – გამოიწვევს დაჯარიმებას 5 000 ლარის ოდენობით ან ადმინისტრაციულ პატიმრობას 60 დღემდე ვადით“.
„ზებრა გადასასვლელზე მოძრაობის საქმეზე“ 6 მარტს ბათუმის საქალაქო სასამართლო განიხილავს მანუჩარ ხოზრევანიძის, არჩილ შოთაძის, გიორგი ჩხაიძის, გოჩა სურგულაძის და ელიზბარ ჩხიკვაძის საქმეებს. თუმცა ელიზბარ ჩხიკვაძისთვის და გოჩა სურგულაძისთვის საქმის მასალები არ ჩაუბარებიათ.
ზებრის საქმეზე დაიბარეს სასამართლოში მალხაზ ირემაძეც. მისი საქმის განხილვა გუშინ, 4 მარტს შედგა. პროცესის აბსურდულობის წარმოსაჩენად სასამართლო სხდომაზე მალხაზ ირემაძე ზებრის ფორმით გამოცხადდა.
6 მარტს გაიმართება ასევე 11 იანვრის საპროტესტო აქციაზე ადმინისტრაციული წესით დაკავებული მზია ამაღლობელის საქმე. მზია ამაღლობელის საქმეზე ოქმი და ვიდეომტკიცებულება გაყალბებულია, რაც შემდეგ მისი უკანონო პატიმრობის საფუძველი გახდა.
11 იანვრის საპროტესტო აქციაზე დაკავებული არასრულწლოვანის, ნინი შავაძის საქმის განხილვაც 6 მარტსაა ჩანიშნული.
12 იანვრის აქციაზე დაკავებული გიორგი კირთაძის საქმეს კი, მოსამართლე სალიხ შაინიძე განიხილავს.
6 მარტს გაიმართება თამარ კურატიშვილის პროცესიც. მან სტენსილი დატოვა ერთ-ერთ შენობაზე: „ირაკლი #ვაფშეარვიცნობ ბესელიას დგებუაძე გილოცავ ნათლისღებას“. კურატიშვილს შენობის ფასადზე წარწერის თვითნებურად შესრულებას ედავებიან.
