2022 წლის თებერვალში უკრაინაში რუსეთის სრულმასშტაბიანი სამხედრო შეჭრის დაწყებიდან დღემდე 12 654-ზე მეტი მშვიდობიანი მოქალაქე, მათ შორის ბავშვები, დაიღუპა.
ამავე პერიოდში 29 392 მშვიდობიანი მოქალაქე დაშავდა ან დაიჭრა.
მონაცემები დღეს, 21 თებერვალს, უკრაინაში გაეროს ადამიანის უფლებათა სადამკვირვებლო მისიის ხელმძღვანელმა დანიელ ბელმა გაავრცელა.
სტატისტიკაში დასახელებულ მსხვერპლთა 84% ცხოვრობდა უკრაინის მთავრობის მიერ კონტროლირებულ ტერიტორიაზე, 16% – რუსეთის მიერ ოკუპირებულ ტერიტორიებზე.
დანიელ ბელი ამბობს, რომ უკრაინაში რუსეთის შეჭრის შემდეგ მოკლული მშვიდობიანი მოსახლეობის რეალური რაოდენობა ოფიციალურ მაჩვენებელზე მეტია.
მოხსენების თანახმად, 2024 წელს მშვიდობიანი მოსახლეობის მსხვერპლი 30%-ით მეტი იყო, ვიდრე 2023 წელს იყო დაფიქსირებული. გაეროს ადამიანის უფლებათა სადამკვირვებლო მისია უკრაინაში ამ მოვლენას უკავშირებს ბრძოლის გააქტიურებას და რუსეთის მიერ საჰაერო ბომბების, მოკლე დისტანციური დრონებისა და შორ მანძილზე მოქმედი რაკეტების უფრო აქტიურ გამოყენებას.
გაერომ გამოთვალა, რომ ნაღმები და სამხედრო საბრძოლო მასალის ნარჩენები უკრაინის ტერიტორიაზე 139 000 კვადრატულ კილომეტრზეა განლაგებული. „ეს სერიოზულ საფრთხეს უქმნის მშვიდობიან მოსახლეობას“, – ამბობს დანიელ ბელი.
___________
ფოტოზე: ბოროდიანკა, უკრაინა. 2022 წლის 3 მარტი. ადგილობრივებს კუბო მიაქვთ ქალაქის დაბომბვის ფონზე. ფოტო: EPA/ALEXA YAKUBOVICH
