145 დღეა აზერბაიჯანელი ჟურნალისტი და რედაქტორი აფგან სადიგოვი ციხეში შიმშილობს. როგორც ჟურნალისტის უფლებადამცველები ამბობენ, სადიგოვის შიმშილობა არის პასუხი მის მიმართ ორი ავტორიტარული ხელისუფლების [აზებაიჯანის და საქართველოს] მხრიდან უსამართლო მოპყრობაზე.
ჟურნალისტი 3 აგვისტოს დააკავეს თბილისში. ქართული მხარის განცხადებით, სადიგოვი აზერბაიჯანის მიერ მუქარისა და გამოძალვის ფაქტებზე გათვალისწინებული დანაშაულისთვის იძებნებოდა.
ოჯახი და უფლებადამცველი ორგანიზაციები, ასევე დამოუკიდებელი მედია, კი მის დაკავებას ილჰამ ალიევის ხელისუფლების მხრიდან პოლიტიკურ დევნას უკავშირებს.
აფგან სადიგოვმა შიმშილობა 2024 წლის 21 სექტემბერს დაიწყო. შიმშილობის დაწყებიდან მე-17 დღეს ჟურნალისტის ჯანმრთელობის მდგომარეობა გაუარესდა და ის N18 სამკურნალო დაწესებულებაში გადაიყვანეს, სადაც ის დღემდე იმყოფება.
10 თებერვალს სოციალური სამართლიანობის ცენტრმა, რომელიც იცავს აფგან სადიგოვის ინტერესებს, გაავრცელა ინფორმაცია მოშიმშილე ჟურნალისტის შესახებ.
„მოშიმშილე ჟურნალისტი კვლავ არ იღებს წყალს და ორგანიზმისთვის საჭირო დანამატებს, რაც მისი ჯანმრთელობის შენარჩუნებისთვის უკიდურესად აუცილებელია. მათივე თქმით, აფგან სადიგოვს უკვე უჭირს საუბარი და ეტლის მეშვეობით გადაადგილება, პერიოდულად კი აქვს გონების დაკარგვის ეპიზოდები,“ – ნათქვამია სოციალური სამართლიანობის ცენტრის განცხადებაში.
სოციალური სამართლიანობის ცენტრმა მიმართა ცალკე სახალხო დამცველს, ცალკე იუსტიციის მინისტრს, ანრი ოხანაშვილს, რომელიც „ქართული ოცნების“ იუსტიციის მინისტრია.
საქართველოს სახალხო დამცველს მოუწოდეს, რომ შექმნას სპეციალური მულტიდისციპლინური კომისია, რომელიც აფგან სადიგოვის მდგომარეობის რეგულარულ მონიტორინგს განახორციელებს და ასევე გააძლიეროს პატიმართან სახელმწიფოს მედიაციისა და ფსიქო-სოციალური მხარდაჭერის პროცესი.
რაც შეეხება „ქართული ოცნების“ იუსტიციის მინისტრის, ანრი ოხანაშვილისადმი მიმართვას, სოციალური სამართლიანობის ცენტრი მოუწოდებს ანრი ოხანაშვილს, აფგან სადიგოვის უკიდურესად მძიმე მდგომარეობიდან და ასევე ევროპული სასამართლოს გადაწყვეტილებიდან შინაარსისა და სულისკვეთებიდან გამომდინარე, მიიღოს ინდივიდუალური გადაწყვეტილება აზერბაიჯანში მის ექსტრადიციაზე უარის შესახებ.
როგორც სოციალური სამართლიანობის ცენტრი წერს, ამის შესაძლებლობას ანრი ოხანაშვილს „სისხლის სამართლის სფეროში საერთაშორისო თანამშრომლობის“ შესახებ კანონი აძლევს.
სოციალური სამართლიანობის ცენტრის განცხადებით, აფგან სადიგოვის ჯანმრთელობის მდგომარეობა უკიდურესად საყურადღებოა. ამ დროისთვის მისი წონა 56 კილოგრამს შეადგენს, რაც დაკავების შემდეგ 40 კილოგრამზე მეტით არის შემცირებული. პენიტენციური დაწესებულების ექიმების შეფასებით, ხანგრძლივი შიმშილობის შემდეგ მისი ჯანმრთელობისთვის მოსალოდნელი ზიანი შეიძლება შეუქცევადი აღმოჩნდეს.
