ნესტან ანანიძემ, სამოქალაქო აქტივისტმა და „სოლიდარობის თემის“ თანადამფუძნებელმა, დღეს, 23 იანვარს, ნიდერლანდების საელჩოს ჯილდო – „ადამიანის უფლებათა ტიტა“ მიიღო.
სიტყვით გამოსვლის დროს ნესტან ანანიძემ ისაუბრა იმ პრობლემებზე, რის წინაშეც წლებია დგანან ქალები ხულოში. მან გაიხსენა სამოქალაქო საპროტესტო აქციები ხულოში, რომელსაც სამედიცინო სერვისების ხელმისაწვდომობისთვის მართავდნენ ახალგაზრდები.
მან ასევე სოლიდარობა გამოუცხადა რეჟიმის ყველა პატიმარს, მათ შორის „ბათუმელების/ნეტგაზეთის“ დამფუძნებელს მზია ამაღლობელს.
„მინდა გამოვეხმაურო იმ პროცესებს, რაც ხდება დღეს საქართველოში და მჯერა, რომ ეს ჯილდო არ მეკუთვნის მხოლოდ მე, ეს ჯილდო ეკუთვნის თითოეულ ადამიანს, რომლებიც იბრძვიან ქუჩებში, ციხეებში, ციხეებთან, რეგიონებში, სოფლებში ადამიანის უფლებებისთვის, ამ ქვეყნის უკეთესი მომავლისთვის.
სოლიდარობა მინდა გამოვუცხადო ყველა პოლიტპატიმარს, რომლებმაც ყველაზე მეტად იწვნიეს ეს ავტორიტარული რეჟიმი საკუთარ მხრებზე, საკუთარ სხეულებზე.
სოლიდარობა მინდა გამოვუცხადო მზია ამაღლობელს, რომელიც არის პოლიტპატიმარი. მზია წარმოადგენს „ბათუმელებს“, რომელმაც არაერთხელ გააშუქა მოწყვლადი ჯგუფების, ჩაგრული ადამიანების ხმა და არაერთხელ აჩვენა, რომ ამ ადამიანებს აქვთ უფლებები და ამ ადამიანებს სჭირდებათ ღირსეული საცხოვრებელი გარემო. იქნებიან ეს ქართველი მუსლიმები, სოფლად მცხოვრები ქალები, სექსუალური უმცირესობები თუ სხვა.
მადლობა მინდა გადავუხადო ნიდერლანდების საელჩოს, რომელიც დაუღალავად შრომობს ჩვენს მხარდასაჭერად რეგიონში, თემებში.
მადლობა მინდა გადავუხადო დედაჩემს, რომელმაც მასწავლა, რომ როცა ვინმეს ჩაგრავენ, ხმა უნდა ამოვიღო და ვიდგე სამართლიანობის მხარეს“- თქვა ნესტან ანანიძემ დაჯილდოებისას.
