მთავარი,სიახლეები

„ცრემლი მომადგა თვალებში, ჩემი სოლიდარობა უთხარით მზიას“ – ბათუმის აქციების მედროშე „ბათუმელებს“ სწერს

21.01.2025 •
„ცრემლი მომადგა თვალებში, ჩემი სოლიდარობა უთხარით მზიას“ – ბათუმის აქციების მედროშე „ბათუმელებს“ სწერს

„დღეს იანვრის მე-20 დღეა და ჩემი შიმშილობის მე-4 დღე, ტელევიზიაში რომ ვნახე „ბათუმელების“ მთავარი რედაქტორი [დამფუძნებელი და დირექტორი – რედაქციის შენიშვნა] მზია ამაღლობელი მისი უკანონო დაკავების შემდეგ პროტესტის მიზნით შიმშილობდა, უკვე მე-7 დღე იყო, ვიამაყე მისით, ჩემი სოლიდარობა უთხარით მას…

თბილისის ემიგრაციის იზოლატორიდან ცრემლი მომადგა თვალებში, სრულიად ვგრძნობ საქართველოს ქუჩებში გამოსული ადამიანების ხმას [სანამ მე ეს წინადადება დავწერე, თითო თვალიდან 2 ცრემლი ჩემს ლოყებზე ჩამომდინდა]“ – ვკითხულობთ წერილში, რომელიც საემიგრაციო ციხიდან თემურ ქათამაძემ, იგივე ჯაფარ ილმაზმა „ბათუმელებს“ გამოუგზავნა [წერილის სტილი დაცულია].

თემურ ქათამაძე ბათუმის საპროტესტო აქციის ერთ-ერთ სიმბოლოდ იქცა. მას „მედროშე ბაბუს“ ეძახიან, რადგან 45 დღის განმავლობაში უწყვეტად, ყველა აქციაზე დაუღალავად აფრიალებდა საქართველო დროშას. ციხიდან გამოგზავნილ წერილშიც თემურ ქათამაძე თავად წერს, აქციის მონაწილეებმა „მედროშე ბაბუა“ შემარქვესო.

თემურ ქათამაძის თქმით, მან ივანიშვილის რეჟიმის კრიტიკა საჯაროდ მას შემდეგ დაიწყო, როცა საქართველოს მოქალაქეობაზე უსამართლოდ უარი უთხრეს.

„2019 წლიდან ივანიშვილის რეჟიმს საჯაროდ დაუპირისპირდი და ჯერ თავიდან სოციალურ ქსელში ფეისბუკში ივანიშვილის რეჟიმი დავადანაშაულე,

„რუსული კანონის ბათუმის პროტესტებში მონაწილეობა მივიღე, ყოველ აქციაზე ხელში მეკავა და ვაფრიალებდი საქართველოს დროშას. 2024 წლის 26 ოქტომბერს არჩევნების ტოტალურად გაყალბების და ევროპის კურსიდან რუსეთისკენ საქართველოს წასვლის შემდეგ საქართველოში დაწყებული მასიურ პროტესტებში მონაწილეობა მივიღე. ეს საქმიანობა ჩემთვის ყველაფერზე უფრო მნიშვნელოვანი იყო. საქართველოს ევროპული მომავლისთვის სამშობლოს სადარაჯოზე განუწყვეტლივ 45 დღე…

მალე დამასახელეს „ბათუმის აქციის მედროშე ბაბუდ“ და მაქციეს ერთ-ერთ სიმბოლოდ“, – გვწერს ციხიდან თემურ ქათამაძე.

მუჰაჯირების შთამომავალი თემურ ქათამაძე ბოლო რამდენიმე წელია საქართველოში ცხოვრობს. მან რამდენჯერმე ითხოვა საქართველოს მოქალაქეობის მიღება, თუმცა მისი ეს მოთხოვნა არ დაკმაყოფილდა. თემურ ქათამაძე ამბობს, რომ მოქალაქეობის მიღებასთან დაკავშირებით ახლა სასამართლო დავა აქვს.

ქათამაძე ადმინისტრაციული წესით ბათუმში, საპროტესტო აქციაზე 11 იანვარს დააკავეს. ეს ის აქციაა, სადაც სტიკერების – „იფიცება საქართველო“ საჯარო სივრცეებში გაკვრისთვის სულ 12 მოქალაქე დააკავეს, მათ შორის, გამოცემა „ბათუმელების“ და ნეტგაზეთის“ დამფუძნებელი და დირექტორი მზია ამაღლობელი. მზია ამაღლობელი იმავე საღამოს გათავისუფლებიდან რამდენიმე საათში ხელახლა, ამჯერად უკვე სისხლის სამართლის წესით დააკავეს.

თემურ ქათამაძეს მოსამართლე ირმა ტოგონიძემ 5 დღით ადმინისტრაციული პატიმრობა შეუფარდა. ადმინისტრაციული პატიმრობიდან გათავისუფლების შემდეგ, რამდენიმე წუთში ბათუმის აქციის მედროშე ხელმეორედ დააკავეს.

17 იანვარს თემურ ქათამაძემ პროტესტის ნიშნად შიმშილობა დაიწყო.

მზია ამაღლობელი ციხეში შიმშილობს, მისი სარჩელი აღკვეთი ღონისძიების შესახებ ქუთაისის სააპელაციო სასამართლომ დღეს, 21 იანვარს არც კი განიხილა.

ვრცლად ამ თემაზე: მზია ამაღლობლის ბრალდება ატარებს დაშინებისა და პოლიტიკური რეპრესიის სახეს – საია

 

გადაბეჭდვის წესი


ასევე: