„ოცნების“ არალეგიტიმურმა მთავრობამ პირველიდან 13 იანვრამდე უქმე დღეები გამოაცხადა.
კერძოდ, 24 დეკემბრით დათარიღებული დადგენილების თანახმად, უქმე დღეებად გამოცხადდა 2025 წლის 3, 6, 8 და 10 იანვარი. აქამდე დასვენების დღეები იყო პირველი, 2 და 7 იანვარი.
შესაბამისად, 13 იანვრამდე ადმინისტრაციულ ორგანოებში უქმე დღეები ცხადდება. ამ პერიოდში შედის შაბათ-კვირაც [4-5 და 11-12 იანვარი].
„ადმინისტრაციული ორგანო განსაზღვრავს მის დაქვემდებარებაში მყოფ/მის სისტემაში შემავალ სამსახურებს/მოსამსახურეებს, რომელთა მიმართაც არ გავრცელდება ეს დადგენილება, თუ მათი ფუნქციების შესრულება სახელმწიფო ხელისუფლების განხორციელებისა და საზოგადოების ნორმალური ფუნქციონირებისთვის წარმოადგენს გადაუდებელ აუცილებლობას“ – ვკითხულობთ დადგენილებაში.
დადგენილება, რომელსაც ხელს „ოცნების“ პრემიერი, კობახიძე აწერს, არ ვრცელდება საქართველოს ეროვნული ბანკის ზედამხედველობას დაქვემდებარებული პირების წინაშე შესასრულებელ ფინანსურ ვალდებულებებზე; „სახელმწიფო შესყიდვების შესახებ“ საქართველოს კანონით გათვალისწინებულ სახელმწიფო შესყიდვებთან დაკავშირებულ საქმიანობაზე, მათ შორის, ამავე კანონის მე-3 მუხლის პირველი პუნქტის „ა.თ“ ქვეპუნქტით გათვალისწინებულ შესყიდვებთან დაკავშირებულ და სახელმწიფო შესყიდვებთან დაკავშირებულ დავების განხილვის საბჭოს საქმიანობაზე.
წინასაახალწლო პერიოდში საქართველოში მასშტაბური საპროტესტო აქციები მიმდინარეობს. უკვე 27 დღეა თბილისში, ბათუმსა და საქართველოს სხვა ქალაქებში მიმდინარეობს აქციები, სადაც ხელახალ არჩევნებსა და აქციაზე დაკავებული პირების გათავისუფლებას ითხოვენ.
_________________
ფოტოზე: საპროტესტო აქცია საქართველოს პარლამენტთან, 2024 წლის დეკემბერი. ფოტო: „ნეტგაზეთი“
