დღეს, 8 დეკემბერს, ხულოში მცხოვრებმა ახალგაზრდებმა განცხადება გაავრცელეს და სოლიდარობა გამოუცხადეს საპროტესტო აქციების მონაწილეებსა და ჟურნალისტებს .
ახალგაზრდები მიმართავენ პასუხისმგებელ ინსტიტუტებს, გაიაზრონ თითოეული ქმედების შედეგები და პატივი სცენ ქართველი ხალხის ევროპულ არჩევანს.
„ჩვენ, ხულოელი ახალგაზრდები, გულისტკივილით ვაკვირდებით საქართველოში ბოლო პერიოდში განვითარებულ მოვლენებს. ვგრძნობთ პასუხისმგებლობას, გამოვხატოთ ჩვენი პრინციპული პოზიცია და დავიცვათ საქართველოში დემოკრატიული ღირებულებები.
საქართველოსთვის ევროპულ და ევროატლანტიკურ ოჯახში გაერთიანება არ არის მხოლოდ გეოპოლიტიკური არჩევანი, ეს არის მშვიდობიანი, დემოკრატიული და განვითარებული ქვეყნის მშენებლობის ერთადერთი გზა. ჩვენს მომავალს თავისუფალ, ადამიანის უფლებებზე დაფუძნებულ და სამართლებრივ გარემოში ვხედავთ.
ჩვენ სოლიდარობას ვუცხადებთ მშვიდობიან საპროტესტო აქციაზე სასტიკად ნაცემ და დაკავებულ ყველა მოქალაქეს, ახალგაზრდას, სამოქალაქო აქტივისტებსა და ჟურნალისტებს.
მივმართავთ პასუხისმგებელ ინსტიტუტებს, გაიაზრონ თითოეული ქმედების შედეგები, პატივი სცენ ქართველი ხალხის არჩევანს და იმოქმედონ არა საკუთარი ძალაუფლების შენარჩუნების, არამედ ქვეყნის ევროპული მომავლის სასარგებლოდ.
ჩვენ, ხულოელი ახალგაზრდები, ვირჩევთ მომავალს, სადაც ადამიანი არის უმთავრესი ღირებულება და თავისუფალი საზოგადოების ამომავალი წერტილი,“-აცხადებენ ახალგაზრდები.
განცხადებას ხელს აწერს 116 ადამიანი. ხელმოწერები გრძელდება.
სრული სია შეგიძლიათ იხილოთ ბმულზე.
_______________
რა ხდება
საქართველოში მეცხრე დღეა საპროტესტო აქციები იმართება.
28 ნოემბერს ირაკლი კობახიძემ განაცხადა შემდეგი – „მივიღეთ გადაწყვეტილება, 2028 წლის ბოლომდე დღის წესრიგში არ დავაყენოთ ევროკავშირთან მოლაპარაკებების გახსნის საკითხი“.
კობახიძის ამ განცხადებას ხალხის ქუჩაში გამოსვლა და უწყვეტი საპროტესტო აქციები მოჰყვა საქართველოს ქალაქებში.
2 დეკემბრიდან გაფიცვა დაიწყეს სკოლებმა და უნივერსიტეტებმა.
საქართველოს მოქალაქეები ითხოვენ, დაინიშნოს ხელახალი არჩევნები და გადადგეს მთავრობა.
„ქართული ოცნების“ ხელისუფლებამ რეპრესიები დაიწყო – ადმინისტრაციული წესით ასობით მოქალაქე დააკავეს, სისხლის სამართლის კოდექსით კი 23 ადამიანი, რომლებსაც 7 და 9 წლით პატიმრობა ემუქრება.
