შინაგან საქმეთა სამინისტროს განსაკუთრებულ დავალებათა დეპარტამენტის ოპერატიული დაგეგმვის სამმართველოს უფროსი, ირაკლი შაიშმელაშვილი თანამდებობას ტოვებს. გათავისუფლების მოთხოვნით მან შინაგან საქმეთა მინისტრს, ვახტანგ გომელაურს უკვე მიმართა. პატაკი გათავისუფლების მოთხოვნაზე ირაკლი შაიშმელაშვილმა თავად გამოაქვეყნა.
სამსახურიდან წასვლის მოთხოვნის მიზეზად ის განცხადებაში ოჯახურ პირობებს ასახელებს.
განცხადება 3 დეკემბრით თარიღდება.
დღეს, 4 დეკემბერს, ოპოზიციური პარტიების ოფისებსა და აქტივისტების საცხოვრებელ სახლებში პოლიცია ჩხრეკის ჩასატარებლად შევიდა.
ოპოზიციური პარტიების წარმომადგენლები და აქტივისტები ადგილზე მისულ პოლიციელებს სთხოვენ განუმარტონ, რის საფუძველზე ატარებენ საგამოძიებო მოქმედებებს, თუმცა ისინი პროცესის დასრულებამდე დეტალურ განმარტებას არ აკეთებენ.
პოლიციამ დღეს საღამოს დააკავა სულ მცირე 9 პოლიტიკოსი და აქტივისტი.
___
- რა ხდება
საქართველოში მეშვიდე დღეა საპროტესტო აქციები იმართება.
28 ნოემბერს „ქართული ოცნების“ პრემიერ-მინისტრმა ირაკლი კობახიძემ განაცხადა შემდეგი – „მივიღეთ გადაწყვეტილება, 2028 წლის ბოლომდე დღის წესრიგში არ დავაყენოთ ევროკავშირთან მოლაპარაკებების გახსნის საკითხი“. კობახიძის ამ განცხადებას ხალხის ქუჩაში გამოსვლა და უწყვეტი საპროტესტო აქციები მოჰყვა საქართველოს ქალაქებში.
2 დეკემბრიდან გაფიცვა დაიწყეს სკოლებმა და უნივერსიტეტებმა.
საქართველოს მოქალაქეები ითხოვენ დაინიშნოს ხელახალი არჩევნები და გადადგეს მთავრობა.
