ბათუმში, საპროტესტო აქციაზე, აქციის ერთი მონაწილე დააკავეს. „ბათუმელების“ პირდაპირ ჩართვაში ჩანდა, რომ აქციის მონაწილე არავითარ წინააღმდეგობას პოლიციას არ უწევდა.
„სიტყვიერი შეურაცხყოფა მიაყენა პოლიციელს… დეტალებში ვერკვევი,“ – უპასუხა „ბათუმელებს“ ირაკლი დგებუაძემ, რომელიც ბათუმის პოლიციის ხელმძღვანელი პირია და ახლაც საპროტესტო აქციაზეა.
შემთხვევის თვითმხილველი ხათუნა ბერიძე კი, ამბობს, რომ მოქალაქე პოლიციელებმა მას შემდეგ დააკავეს, როცა მან აქციაზე მყოფ პოლიციელებს მიუთითა, მზესუმზირის ნარჩენები ქუჩაში არ დაეყარათ.
საპროტესტო აქცია ბათუმში საკონსტიტუციო სასამართლოსთან გრძელდება. აქციაზე არჩევნების ხელახლა ჩატარებას ითხოვენ.
დღეს, 3 დეკემბერს, საკონსტიტუციო სასამართლომ უარი თქვა განეხილა პრეზიდენტის, ასევე 34 დეპუტატის სარჩელი, რომლითაც არჩევნების შედეგების ბათილობას ითხოვდნენ. თუ სასამართლო ამ სარჩელს დააკმაყოფილებდა, ქვეყანაში ხელახლა არჩევნები ჩატარდებოდა.
