დღეს, 25 ნოემბერს, პრემიერ-მინისტრმა ირაკლი კობახიძემ მინისტრობის კანდიდატები წარადგინა.
განახლებულ მინისტრთა კაბინეტს ნდობა პარლამენტმა უნდა გამოუცხადოს.
მინისტრობის კანდიდატები ყოფილი დეპუტატები არიან, რომლებიც „ქართული ოცნებას“ წარმოადგენდნენ პარლამენტში.
იუსტიციის მინისტრის პოსტზე პარლამენტის იურიდიული კომიტეტის თავმჯდომარე ანრი ოხანაშვილი წარადგინეს, რომელიც ბოლო წლებია ანტიევროპული რიტორიკით გამოირჩევა. ის ასევე მომხრე და ხელმომწერია რუსული კანონის, რომლის განხილვის დროს ის ოპოზიციონერ დეპუტატებს საქართველოს პარლამენტში ყველაზე აქტიურად უშლიდა ხელს, მიკროფონს უთიშავდა, თუ კითხვის შინაარსი არ მოეწონებოდა და დარბაზიდან აძევებდა მათ.
ოპოზიციონერი დეპუტატების გარდა ოხანაშვილი ხელს უშლიდა სამოქალაქო სექტორის წარმომადგენლებსაც რუსული კანონის განხილვაში მონაწილეობასა და აზრის გამოხატვაში.
ანრი ოხანაშვილისთვის ბიძინა ივანიშვილი მეცენატია და არა ოლიგარქი, როგორც ამას ევროპარლამენტარები მიიჩნევენ.
საგარეო საქმეთა მინისტრის პოსტზე ილია დარჩიაშვილს მაკა ბოჭორიშვილი შეცვლის. ბოჭორიშვილიც მე-10 მოწვევის პარლამენტში ევროპასთან ინტეგრაციის კომიტეტის წევრი იყო, თუმცა ბოლო წლებში ისიც ანტიევროპული რიტორიკით გამოირჩეოდა.
მაკა ბოჭორიშვილიც რუსული კანონისა და ცენზურის კანონის მხარდამჭერი დეპუტატია.
მინისტრობის მესამე კანდიდატი დავით სონღულაშვილია. ის საქართველოს სოფლის მეურნეობის მინისტრის პოსტზე წარადგინეს.
სონღულაშვილიც „ქართულ ოცნებას“ წარმოადგენდა საქართველოს პარლამენტში.
ის კანონპროექტის ინიციატორი იყო, რომლის მიხედვით, სიძულვილის ენისა და უხამსობის შემცველი პროგრამა და რეკლამა კომუნიკაციების კომისიის რეგულირების სფეროში უნდა მოქცეულიყო, თუმცა ამ კანონპროექტმაც ბევრი კრიტიკა გამოიწვია.
სონღულაშვილი ამბობდა, რომ დეკემბერში მაუწყებლის შესახებ კანონში მიღებულ ცვლილებებზე ევროპის საბჭოსგან მიღებული რეკომენდაციები არ გამოადგათ, რადგან ევროკომისიამ, მათი გათვალისწინების მიუხედავად, რეკომენდაცია შესრულებულად არ ჩაუთვალა.
მინისტრობის კანდიდატები იმ პარლამენტმა უნდა დაამტკიცოს, რომლის ლეგიტიმურობასაც საქართველოს მოსახლეობის დიდი ნაწილი არ აღიარებს.
ახალი არჩევნების მოთხოვნით ათ დღეზე მეტია ქვეყანაში საპროტესტო აქციები მიმდინარეობს. 26 ოქტომბრის არჩევნები არც საქართველოს პარტნიორ სახელმწიფოებს უღიარებიათ.
საპროტესტო აქციები კი ქვეყანაში არ წყდება.
პარლამენტის პირველი სხდომა, რომლის ლეგიტიმურობასაც არც ოპოზიცია, არც პრეზიდენტი და არც სამოქალაქო სექტორი არ აღიარებს, დღეს, 25 ნოემბერს, პროტესტის ფონზე გაიხსნა.
