ზურაბ ზანდარაძე ბათუმის ბულვარის სამართალდარღვევათა ოქმის გასაჩივრებას აპირებს, რომლითაც ის 500 ლარით დაჯარიმდა. ჯარიმის კანონიერება ბათუმის საქალაქო სასამართლომაც დაადასტურა. ზურაბ ზანდარაძე მეოთხე წელია ანბანის კოშკის მიმდებარე ტერიტორიაზე ველოსიპედებს აქირავებს.
“თუკი დარღვევაა, აქამდე რატომ არ მოვიდა ვინმე? ჩემი დაც აქირავებს ველოსიპედებს მელიქიშვილის ქუჩის დასაწყისში. ის ადგილი ქალაქის მერიას ეკუთვნის და ყოველთვიურად იხდის გადასახადს, დაახლოებით 40 ლარს. მეც მივედი მერიაში და ნებართვა მოვითხოვე, გადასახადსაც გადავიხდიდი, მაგრამ უარი მითხრეს. განმიმარტეს, რომ ადგილი, სადაც ველოსიპედს ვაქირავებ, ანბანის კოშკს ეკუთვნის,” – გვიყვება ზურაბ ზანდარაძე.
“დარღვევა დაფიქსირდა მონიტორინგის შედეგად და შევადგინეთ სამართალდარღვევის ოქმი. თუკი ზურაბ ზანდარაძე თვლის, რომ მისი კანონიერი ინტერესი შეილახა, მას შეუძლია მიმართოს სასამართლოს,”- აცხადებს ბათუმის ბულვარის ადმინისტრაციის მონიტორინგის სამსახურის მთავარი სპეციალისტი, გიორგი წიკლაური. მან დაგვიდასტურა, რომ ზურაბ ზანდარაძეს სხვა ადგილს ბულვარის ადმინისტრაცია ვერ შესთავაზებს. მიზეზი ასეთია – აუქციონი ველოსიპედების გაქირავების ადგილის მოსაწყობად არ ცხადდება.
გიორგი წიკლაურმა ვერ გვიპასუხა, რის გამო არ ცხადდება აუქციონი ველოსიპედების მფლობელებისთვის. “მარკეტინგის სამსახური მუშაობს ამაზე და ის განსაზღვრავს მიზანშეწონილობას. ალბათ, იმიტომ არ ცხადდება, რომ გადატვირთულია ველობილიკები,” – ამბობს გიორგი წიკლაური.
ბულვარის ადმინისტრაციის უფროსმა, ცისკარი გოგიტიძემ “ბათუმელებს” იმავე შეკითხვაზე უთხრა, რომ ამ ველოსიპედების გვერდით ელექტრომობილები ქირავდება: “ხელი ეშლება იმ ადამიანს, რომელმაც ჩვენ მიერ გამოცხადებული აუქციონი მოიგო. მას დაახლოებით 4 ათასი ლარი აქვს გადახდილი 6 თვისთვის”.
რატომ არ ახდენდა ბულვარის ადმინისტრაცია რეაგირებას აქამდე ზურაბ ზანდარაძის ველოსიპედებზე? – ცისკარი გოგიტიძემ გვითხრა, რომ ის ახალი თანამშრომელია ადმინისტრაციის და ამ შეკითხვას ვერ უპასუხებს. გიორგი წიკლაურის თქმით კი, გასულ წელს მონიტორინგის სამსახურს იმავე ადგილზე ველოსიპედების გაქირავება არ დაუფიქსირებია.
