„ერთიანი ნაციონალური მოძრაობა“ უწყებათშორის კომისიას და ხულოს მუნიციპალიტეტის გამგეობას განცხადებით მიმართავს და ბეშუმის ინცინდენტის შესწავლას მოითხოვს. პარტიის განცხადებით, საუბარია 6 აგვისტოს, ბეშუმში გამართულ სახალხო დღესასწაულზე, სადაც ტრიბუნაზე გამოსვლის შესაძლებლობა აჭარის მთავრობის ყოფილ თავმჯდომარეს, ლევან ვარშალომიძეს არ მისცეს.
„მოვისმინეთ, რომ იქ გაჟღერდა პოლიტიკური შინაარსის დაპირებები „ქართული ოცნების“ ლიდერების მხრიდან. წინასაარჩევნო პერიოდში თანაბრად უნდა ჰქონდეს ნებისმიერ პარტიას საშუალება, მიმართოს ხალხს. ეს უფლება ბეშუმობაზე ლევან ვარშალომიძის შემთხვევაში დაირღვა,“ – ამბობს პეტრე ზამბახიძე „ერთიანი ნაციონალური მოძრაობიდან“. მისი შეფასებით, სახალხო ზეიმზე ტრიბუნის გამოყენება პოლიტიკოების მხრიდან ადმინისტრაციული რესურსის გამოყენებად არ უნდა ჩაითვალოს.
„სახალხო ზეიმი ეწყობა ბიუჯეტის ხარჯზე და ამ დროს ტრიბუნის გამოყენების საშუალება აგიტაციისთვის არც ერთ პოლიტიკოსს არ უნდა მიეცეს, – ამბობს „სამართლიანი არჩევნების“ აჭარა-გურიის კოორდინატორი, მადონა ბერიძე – ჩვენ ვიკვლევთ ამ ფაქტს. როგორც გავიგეთ, ზეიმის ორგანიზატორები ამბობენ, რომ მათთვის წინასწარ არ მიუმართავს „ნაციონალურ მოძრაობას“, რომ ღონისძიების განრიგში ჩაესვათ ლევან ვარშალომიძის გამოსვლა. პარტიაში საწინააღმდეგოს ამტკიცებენ. ამის დადასტურება ამ ეტაპზე რთულია”.
მადონა ბერიძის შეფასებით, ბეშუმობაზე სახალხო ზეიმისთვის განკუთვნილი ტრიბუნა არც „ქართულ ოცნებას“ გამოუყენებია აგიტაციისთვის: „იქ იყო ზოგადი ხასიათის დაპირებები, არ ყოფილა მოწოდებები. ეს ვერ ჩაითვლება წინასაარჩევნო აგიტაციად“.
„ერთიანი ნაციონალური მოძრაობა“ კონკრეტულ პოლიციელს ასახელებს, ვინც ლევან ვარშალომიძეს ხალხისთვის მიმართვის საშუალება არ მისცა: „ეს იყო ხელვაჩაურის პოლიციის უფროსი ზაზა დიასამიძე. ჩვენ მივმართავთ ხულოს გამგეობასაც, რადგან ამ მუნიციპალიტეტის ტერიტორიაზე მოხდა პოლიტიკური პარტიის წინასაარჩევნო საქმიანობაზე ხელშეშლა,“ – ამბობს პეტრე ზამბახიძე.
