ბათუმის ინკლუზიური თეატრის დასი ასაჩივრებს მერიის გადაწყვეტილებას, რომლის თანახმადაც 2024 წელს ინტეგრირებულ სპექტაკლებს ორგანიზება უნდა გაუწიოს ტენდერით გამარჯვებულმა, სრულიად ახალმა ჯგუფმა. დასის ხელმძღვანელისა და წევრების მშობელთა თქმით, აღნიშნულ ჯგუფს შშმ ადამიანებთან მუშაობის კომპეტენცია არ გააჩნია.
ბათუმის მუდმივ მოქმედი სატენდერო კომისიის გადაწვეტილების ოქმი დასმა დავების განხილვის საბჭოში გაასაჩივრა, რის შედეგადაც საბჭომ საჩივარი ნაწილობრივ დააკმაყოფილა [პრეტენდენტის მიერ წარდგენილი კოლექტივის რამდენიმე წევრის კომპეტენციის დამადასტურებელი დოკუმენტაციის ნაწილში], მიუხედავად ამისა სატენდერო კომისიამ მიიღო გადაწყვეტილება, რომ გაფორმდეს ხელშეკრულება.
„დავების საბჭოს მიერ ხარვეზებზე მითითების მიუხედავად, კომისია სახელმწიფო შესყიდვების სააგენტოს ვებგვერდზე აქვეყნებს ოქსმ იმის შესახებ, რომ გაფორმდეს ხელშეკრულება. ჩვნ მოვითხოვთ ბათილად ცნონ მიღებული გადაწყვეტილება, რეალურად გადაახედონ სპეციალისტებს ეს მიღებული დოკუმენტაცია და თუ გამოვლინდება ხარვეზი, მისცენ დისკვალიფიკაცია ამ პრეტენდენტს. ასე უნდა მოხდეს ყველას შემთხვევაში, მათ შორის ჩემ შემთხვევაშიც“, – ამბობს ნატალია გალოგრე, ინკლუზიური დასის ხელმძღვანელი.
ნატალია გალოგრე
ბათუმის ინკლუზიური თეატრის დასი 2019 წელს დაარსდა. დასის ჩამოყალიბების იდეა მას შემდეგ გაჩნდა, რაც იმავე წელს ბათუმის მერიის პროგრამული ხარჯით გაიწერა ინტეგრირებული [შშმ და ტიპური განვითარების ბავშვების თანამონაწილეობით] სპექტაკლის დადგმა.
„ამ სპექტაკლის რეჟისორად მომიწვიეს, ძალიან რეზონანსული აღმოჩნდა პირველივე სპექტაკლი და გადავწყვიტეთ, რომ ჩამოგვეყალიბებინა დასი. შემდეგ დავიწყეთ სახსრების მოძიება, რადგან ჩვენ ფინანსები არ გვქონდა. ვწერდით სხვადასხვა პროექტს და ამით რაღაცნაირად ვარსებობდით“, – ამბობს ნატალია გალოგრე.
კადრები ბათუმის ინკლუზიური თეატრალური დასის სპექტაკლებიდან: “ერთი უბრალო ამბავი”; და “ყველას უყვარს ოპალი”.
ბათუმის ინკლუზიური თეატრალური დასის ბათუმის მერიის ყოველწლიურ დაფინანსებაზე გადაყვანის სურვილი დასმა არაერთხელ გაახმოვანა მერიასთან.
„2022 წელს მივედით ბათუმის მერიაში და ვთხოვეთ ბათუმის მერიას დაფინანსება უშუალოდ ჩვენი დასისთვის, რომ რაღაცნაირად მუდმივობის განცდა გვქონოდა“, – ამბობს ნატალია. წელს მერიამ ბათუმის ინკლუზიური თეატრის დასი, დასის მიერ წარდგენილი ხარჯთაღრიცხვით დააფინანსა.
„თითქმის დასის დაარსებიდანვე ჩართულია ჩემი შვილი ამ პროცესში. წლების მანძილზე ეს დასი იბრძოდა, რომ რაღაც ფინანსები მოეპოვებინა, პროექტების ხარჯზე წვალებით გაჰქონდა თავი. ვცდილობდით ფინანსური მდგრადობა მოგვეპოვებინა და ხშირად მივმართავდით მერიას.
ამ ახალგაზრდებს/ინკლუზიურ დასს აუცილებლად სჭირდება საარსებო წყარო, რომ ყოველთვის ენთუზიაზმზე არ იყვნენ და მათაც ჰქონოდათ რაღაც მცირეოდენი შემოსავალი, ჰონორარის სახით.
ბევრჯერ მივმართეთ მერიას და სიმართლე გითხრათ, მეც იქ ვიყავი, როდესაც ბათუმის მერმა, არა მხოლოდ დამოუკიდებელი გადაწყვეტილებით [მასთან ერთად მაშინ იმყოფებოდა სხვა განყოფილებებიც], მიზნობრივად ამ კონკრეტული, ინკლუზიური დასისთვის გამოყო ბიუჯეტი. თუმცა, რატომღაც დასს კვლავ ბრძოლა უწევს ამ თანხის მოსაპოვებლად“, – ამბობს რუსუდან შერვაშიძე, დასის ერთ-ერთ წევრის, 20 წლის თათია გოგიტიძის მშობელი.
რუსუდან შერვაშიძე და თათია გოგიტიძე
ბათუმის დამოუკიდებელი ცენტრის ხელმძღვანელი, იურისტი რამინ მაჭარაშვილი ამბობს, რომ სატენდერო კომისია შესაძლოა სათანადოდ ვერ ერკვეოდეს შშმ პირთა საკითხში, ამიტომ ის მიიჩნევს, რომ საჭიროა უფრო საფუძვლიანი მოკვლევა და კონსულტაცია შშმ პირთა უფლებებსა და საჭიროებებზე მომუშავე ორგანიზაციებთან:
„სატენდერო კომისიის დოკუმენტები რომ ვნახე, იქ არის საკითხები, რომლებიც მიანიშნებს, რომ კარგად არ არის შესწავლილი საკითხი და ზედაპირულად მინიშნებულია, რომ იქ პრობლემა არ არის.
მაგალითად, მთავარი მიმართულება ინკლუზიური თეატრალური დასისა არის ის, რომ ის ყველა შშმ პირზე იყოს ადაპტირებული, მათ შორის მნიშვნელოვანია სმენის არმქონე ხალხი. შესაბამისად, ჟესტური ენის თარგმანი, როგორი იქნება და რამდენად კვალიფიციური იქნება ის ხალხი, ვინც ამას გადათარგმნის, ერთ-ერთ ყველაზე მნიშვნელოვანია. რაც კონკრეტულად თეატრალური დასის წარმომადგენლებმა მაჩვენეს, მე იქ ვერ ამოვიკითხე, მაგალითად, რომ კვალიფიციური კადრი თარგმნის ჟესტურ ენაზე;
კიდევ იყო პრობლემები სხვა მიმართულებით, მაგალითად, ზოგიერთი სპეციალისტი ვინც იყო იქ ჩართული, არ არის იმ მიმართულებით ზუსტად სატენდერო კომისიის მოთხოვნების შესაბამისი კადრი. ეს, ასე ვთქვათ, გავარკვიეთ ჩვენი შიდა კავშირებით. სატენდერო კომისიას ზუსტად ეს ევალება, რომ გაარკვიოს რამდენად შეესაბამება პრეტენდენტის მიერ წარმოდგენილი ინფორმაცია რეალობას.
ჩვენ და სხვა ორგანიზაციები ამისთვის ვარსებობთ, რომ თუ კომისიას კონსულტაცია ან რჩევები დასჭირდებოდა, მოგვმართოს. ჩემთვის მნიშვნელობა არ აქვს, ვინ განახორციელებს ამ პროგრამას, რომელიც მერიას აქვს. მთავარია, კვალიფიციურად განხორციელდეს“, – განმარტავს რამინ მაჭარაშვილი.
რამინ მაჭარაშვილი
დასის წევრი, ეტლით მოსარგებლე 15 წლის ანეტა ტაკიძე ამბობს, რომ დასმა წლების მანძილზე საკმაოდ დიდი გამოცდილება დააგროვა საიმისოდ, რომ დაფინანსებისთვის ბრძოლა არ უწევდეთ და ბიუროკრატიული ხარვეზების გამო არ ფერხდებოდნენ მუშაობისას: „მართლა დაუშვებელია ასეთი პრობლემები გვხვდებოდეს, როცა დასი ამდენი ხანია არსებობს და ასე ხშირად ვაკეთებთ სპექტაკლებს, ვმონაწილეობთ აქტიურად“.
17 წლის ლინდა დავითაძე წელიწად-ნახევრის წინ შეუერთდა დასს. „ჩვენი დასის სლოგანია – თავს ზემოთ ძალა არსებობს და რომ ეს დასი სიყვარულია. მე საკუთარი თვალით ვიხილე, რომ ეს დასი მართლა ემსახურება ამ ორი სლოგანის განხორციელებას.
ჩვენ მართლა ვამტკიცებთ, რომ არსებობს თავს ზემოთ ძალა. მართლა ისეთი ატმოსფეროა [დასში], რომ სიყვარული ტრიალებს ყველგან. ჩვენ ეჭვი გვეპარება, რომ ასეთი პრინციპებითა და ღირებულებებით გააგრძელებს სხვა ამ საქმის კეთებას. ამიტომ არ მინდა, რომ ეს სიყვარული, სითბო და ყველაფერი კარგი, რაც საერთოდ ამ დასმა მოგვცა, წყალში ჩაგვეყაროს“, – ამბობს ის.
დასის წევრების მშობლები ამბობენ, რომ არ აქვთ ზუსტი წარმოდგენა იმის შესახებ, თუ რა ფორმით და რა შემადგენლობით გააგრძელებს ეს კონკრეტული დასი არსებობას მას შემდეგ, რაც პასუხისმგებლობას ინტეგრირებული სპექტაკლების დადგმაზე სხვა შემოქმედებითი ჯგუფი გადაიბარებს.
მედიასთან სატელეფონო საუბრისას მერიის სატენდერო კომისიის თავმჯდომარემ, სოფო ხალვაშმა თქვა, რომ სავარაუდოდ ახალი ტენდერი გამოცხადდება.
კომისიის ერთ-ერთი წევრი, ლამზირა ბოლქვაძე კი ადასტურებს, რომ მიუხედავად საჩივრის ნაწილობრივი დაკმაყოფილებისა, ხელშეკრულება გაფორმების ეტაპზეა.
„პრეტენდენტს [ტენდერში გამარჯვებულ კომპანიას] რაც მოვთხოვეთ, რაც სატენდერო დოკუმენტაციით გვქონდა გათვალისწინებული, ყველა შესაბამისი დოკუმენტი წარმოადგინა. რა თქმა უნდა, ჩვენ მას მონიტორინგს გავუწევთ და როგორც საწყის ეტაპზე, ისე მიმდინარეობისას დავაკვირდებით“, – თქვა ლამზირა ბოლქვაძემ.
