„ჩემი ხელით დავანგრიე, მივშალე, მოვშალე და ხელშეკრულების გაუქმების შესახებ მერიაში განცხადება შემაქვს,” – უთხრა “ბათუმელებს” ინდმეწარმე თამილა თოფურიძემ. ის ბათუმის ღვთისმშობლის ტაძრის მიმდებარე სკვერში საზოგადოებრივ ტუალეტს აშენებდა, რაც 5 აგვისტოს “მამულიშვილთა კავშირმა” გააპროტესტა.
თამილა თოფურიძემ “ბათუმელებს” უთხრა, რომ ის მერიასთან გაფორმებული ხელშეკრულების მთლიანად მოშლას აპირებს. ხელშეკრულების მიხედვით, ბიზნესმენს წლის ბოლომდე ქალაქის 6 სხვადასხვა სკვერში უნდა აეშენებია საპირფარეშოები. მერიამ ტუალეტებისთვის ადგილები თამილა თოფურიძეს 15 წლის ვადით გადასცა, ყოველწლიურად ბიუჯეტში კი 3200 ლარი უნდა გადაეხადა.
ასევე საზოგადოებრივი პროტესტის გამო, ივლისში, თამილა თოფურიძეს საპირფარეშოს აშენების ნება აღარ მისცა მერიამ ირაკლი აბაშიძის ქუჩაზე მდებარე სკვერშიც. მერია აუქციონში გამარჯვებულ თოფურიძეს სხვა მისამართის შერჩევას დაჰპირდა.
“საერთოდ აღარ მინდა სადმე ავაშენო საპირფარეშო… დღეს შემაქვს მერიაში განცხადება და მოვითხოვ ხელშეკრულების მოშლას. მერე რა იქნება, ჯერ არ ვიცი. თუ ასე უნდა ხალხს, ასე იყოს, სადარბაზოებს და ეკლესიის ღობეს იყენებს ხალხი ტუალეტებად,” – ამბობს თამილა თოფურიძე.
მერიის პრესსამსახურში ადასტურებენ, რომ მოიჯარეს მერიამ მისცა წერილობითი მითითება, შეეჩერებინა სამუშაოები ეკლესიასთან მდებარე სკვერში საზოგადოებრივი პროტეტის გამო. მოიშლება თუ არა ხელშეკრულება და ვინ ააშენებს საზოგადოებრივ ტუალეტებს ბათუმში – ჯერ უცნობია.
