ტერიტორია, სადაც ადრე სანატორიუმი „მზიური“ იყო, აჭარის ფინანსთა და ეკონომიკის სამინისტრომ ორჯერ გაიტანა აუქციონზე, თუმცა ქონება არ გაიყიდა. არშემდგარი აუქციონებიდან პირველი, მიმდინარე წლის 17 ივნისს დასრულდა, ხოლო მეორე – 14 ივლისს.
ტერიტორია, 15 070 კვ/მ ფართობი, ზღვის პირას, მახინჯაურის რკინიგზის სადგურთან ახლოს მდებარეობს. როგორც „ბათუმელებს“ იქვე მცხოვრებმა ადამიანებმა უთხრეს, ტერიტორიის დასათვალიერებლად აქ ხშირად მოდიან: „ბოლოს 10 დღის უკან იყვნენ. ხშირად ირანელები მოჰყავთ, არაბებიც იყვნენ, მაგრამ ვის მოჰყავს და რას უპირებენ ამ ადგილს, ზუსტად არ ვიცით“.
აუქციონის პირობის მიხედვით ტერიტორია 3 მილიონ ლარად იყიდება, სადაც შემსყიდველი დამატებით 38 მილიონი აშშ დოლარის ინვესტიციას განახორციელებს. აქ უნდა აშენდეს მრავალფუნქციური შენობა-ნაგებობები: სასტუმროს ტიპის დასასვენებელი სახლი, საკონფერენციო დარბაზი, სპორტულ-გამაჯანსაღებელი ცენტრი, სარეკრიაციო ზონა, ავტოსადგომი და სხვადასხვა ტიპის კვების ობიექტები, რომლებიც ხელშეკრულების გაფორმებიდან 30 თვის ვადაში უნდა ამოქმედდეს.
არშემდგარი აუქციონის პირობების მიხედვით, ახალ ობიექტში მყიდველის ან/და მესამე პირის მიერ, არანაკლებ 80 მოქალაქის დასაქმებაა აუცილებელი, რომელთა შორის არანაკლებ 90% საქართველოს მოქალაქე უნდა იყოს.
აჭარის ფინანსთა და ეკონომიკის სამინისტრო აუქციონს, სავარაუდოდ, მესამედაც გამოაცხადებს, თუმცა თარიღი და შეიცვლება თუ არა პირობები, ჯერ უცნობია.
სანატორიუმი „მზიური“, სხვა 20 ობიექტთან ერთად, ყაზახური ინვესტიციის განხორციელების პირობით, 2006 წელს, მაშინდელმა მთავრობამ ნიდერლანდებში ერთი კვირის დარეგისტრირებულ კომპანიას „აჭარა რიზორთს ჰოლდინგ ბი.ვი.“-ს მიჰყიდა. მყიდველმა 21-პროექტიდან მხოლოდ ერთი განახორციელა – „მედეას“ ადგილზე „რედისონ ბლუ“ ააშენა.
10 წლის შემდეგ კომპანიასთან გაფორმდა მორიგი შეთანხმება და სახელმწიფომ გარკვეული ქონება დაიბრუნა, მათ შორის ყოფილი „მზიურის“ ტერიტორიაც. ყოფილი სანატორიუმის შენობა კი დანგრეულია.
ყოფილი პანსიონატი „მზიურის“ ეზო / ფოტო: თედო ჯორბენაძე
