20 ივლისს, ბორჯღალოსნები 2024 წლის ზაფხულის ბოლო ტესტ-მატჩს სიდნეიში, მასპინძელ ავსტრალიასთან გამართავენ. „ალიანს სთედიუმზე“ შეხვედრა თბილისის დროით, დილის 09:45 საათზე დაიწყება.
„ავსტრალია ძალიან კარგი გუნდია, კარგი სამწვრთნელო შტაბით. ჯო შმიდტის გარშემო ძლიერი გუნდი შეიკრიბა. ჩვენ მათთან არასდროს გვითამაშია მსოფლიო თასს მიღმა, არასდროს გვითამაშია ავსტრალიაში მათ წინააღმდეგ და არასდროს დაგვიმარცხებია ისინი. ეს არის შესანიშნავი შესაძლებლობა საუკეთესოდ წარმოვაჩინოთ საკუთარი თავი“ – განაცხადა ბორჯღალოსნების მთავარმა მწვრთნელმა, რიჩარდ კოკერილმა.
საქართველოს რაგბის ეროვნული ნაკრები „ვოლაბებთან“ ისტორიაში მესამედ ითამაშებს – პირველად მსოფლიო თასს მიღმა.
საქართველო ავსტრალიას პირველად 2019 წლის იაპონიის მსოფლიო თასზე შეხვდა და ანგარიშით – 27:8 წააგო. შემდეგ 2023 წლის საფრანგეთის მსოფლიო თასზე და ამჯერადაც მეტოქემ გაიმარჯვა ანგარიშით – 35:15.
2024 წელს ზაფხულის სერიის წინა ორი მატჩიდან საქართველოს ნაკრებმა ერთი მოიგო და ერთიც წააგო. პირველი თამაში საქართველოს ნაკრებმა ბათუმში, ფიჯის ნაკრების წინააღმდეგ დათმო ანგარიშით – 12-21. ხოლო, მეორე მატჩში კი უკვე იაპონიას სტუმრად სძლია ანგარიშით – 23-25.
