სამთვიანი კლების შემდეგ, ივნისში ხაჭაპური ისევ გაძვირდა. 2024 წლის ივნისში ერთი სტანდარტული იმერული ხაჭაპურის მომზადების საშუალო ღირებულება 6 ლარი იყო, რაც წინა თვესთან, მაისთან შედარებით 2.9%-იანი ზრდაა, წლიურ ჭრილში კი, ანუ 2023 წლის ივნისთან შედარებით, ზრდა 6.8%-ია. ეს ISET-ის მორიგი კვლევის შედეგია.
ISET-ის „ხაჭაპურის ინდექსი“ იმ კალათას იყენებს ინფლაციის დასაანგარიშებლად, რომელიც მხოლოდ იმერული ხაჭაპურის გამოსაცხობად საჭირო ინგრედიენტებს შეიცავს. ესაა: ფქვილი, ყველი, საფუარი, რძე, კვერცხი და კარაქი. ინდექსი მოიცავს გაზის და ელექტროენერგიის ხარჯებსაც. „ხაჭაპურის ინდექსის“ შთაგონების წყარო ჟურნალ Economist-ის „ბიგ მაკის“ ინდექსია – ქვეყანაში ინფლაციის მარტივი და გამჭვირვალე ინდიკატორი.
„ყველი ყველაზე მეტად ქუთაისში გაძვირდა: წლიურად 19%-ით, თვიურად კი, 17%-ით,“ – ვკითხულობთ ISET-ის მიერ გავრცელებულ ინფორმაციაში, სადაც ხაზგასმულია ისიც, რომ ყველი სხვა რეგიონებშიც გაძვირდება:
„იქიდან გამომდინარე, რომ იმერეთი ქვეყნის უმსხვილესი ყველის მწარმოებელი რეგიონია, როგორც წესი, ფასების სეზონური ცვლილება ყველაზე შესამჩნევი სწორედ ქუთაისშია. აღნიშნული გვაფიქრებინებს, რომ ხაჭაპურის ინდექსის ზრდა მომავალშიც გაგრძელდება, რადგან ქუთაისში ყველის ფასების ზრდა სავარაუდოდ ქვეყნის სხვა რეგიონებზეც გავრცელდება,“ – მიიჩნევენ ISET-ის ანალიტიკოსები.
ISET-ის მონაცემებით, 2024 წლის ივნისში იმ ინგრედიენტებიდან, რაც ხაჭაპურის მომზადებას სჭირდება, მხოლოდ კვერცხი გაიაფდა 1.7%-ით.
„მნიშვნელოვნად გაიზარდა კარაქის [+18.1%], რძის [+16.2%], საფუარის [+14.9%] და ყველის [+7.2%] ფასები, ხოლო ფქვილი 1.4%-ით გაძვირდა.
რძის პროდუქტების ფასების ასეთი ცვლილება შეიძლება საერთაშორისო ფასების ზრდით იყოს განპირობებული – FAO-ის რძის პროდუქტების ფასის ინდექსის თანახმად, რომელიც წლიურ ჭრილში 6.5%-ით გაიზარდა, ყველაზე მნიშვნელოვნად კარაქის ფასი შეიცვალა და 35.8%-იანი ზრდა დააფიქსირა,“ – აღნიშნულია ISET-ის მიერ გავრცელებულ ინფორმაციაში.
