10 ივლისს „დინამო ბათუმი“ დამარცხდა „ლუდოგორეცთან“ ჩემპიონთა ლიგის საკვალიფიკაციო ეტაპზე გამართულ მატჩზე ანგარიშით – 3:1.
თამაში ბულგარეთში გაიმართა. შეხვედრაში „დინამოელების“ მხრიდან ერთადერთი გოლი ლადო მამუჩაშვილმა გაიტანა.
ანდრეი დემჩენკო, „დინამო ბათუმის“ მწვრთნელი
მატჩის შემდეგ „დინამო ბათუმმა“ ფეისბუქზე გუნდის მწვრთნელის, ანდრეი დემჩენკოს კომენტარი გაავრცელა. დემჩენკო აღნიშნავს, რომ შეხვედრის პირველი ტაიმი „ლუდოგორეცის“ უპირატესობით წარიმართა:
„ჩვენი ბიჭების უმეტესობას ამ დონის გამოცდილება არ აქვს, ცოტას ნერვიულობდნენ, განიცდიდნენ. პირველი ტაიმი უნდა შევიტანოთ „ლუდოგორეცის“ აქტივში.
მეორე ტაიმში უფრო თავდაჯერებულები გამოვედით, გავიტანეთ გოლი, გვქონდა მომენტები… გარკვეულ ეპიზოდებში არ გაგვიმართლა, ასე რომ ვფიქრობ მეორე ტაიმში უკეთესად ვითამაშეთ.
შეიძლება ითქვას, რომ მესამე გოლმა ცოტა გაგვტეხა. ეს გოლი ჩვენი შეცდომის გამო მივიღეთ და ვფიქრობ „ლუდოგორეცმა“ ამ გოლით დამატებითი ენერგია მიიღო, ჩვენ კი პირიქით – თავდაჯერება დავკარგეთ.
შემდეგ მატჩს სახლში ვთამაშობთ. გავაანალიზებთ საკუთარ შეცდომებს, რომლებიც ამ თამაშში დავუშვით. მინდა ასევე დავძინო, რომ ამ თამაშმა ჩვენ ფეხბურთელებს გარკვეული გამოცდილება შესძინა. განმეორებით შეხვედრაში უფრო თამამები ვიქნებით. ბათუმში სულ სხვა თამაშს ვიხილავთ“.
გუნდებს შორის საპასუხო შეხვედრა ბათუმში 17 ივლისს გაიმართება.
შეგახსენებთ, რომ ორი მატჩის ჯამში გამარჯვებული გუნდი ჩემპიონთა ლიგის საკვალიფიკაციო ეტაპზე გააგრძელებს სვლას, ხოლო დამარცხებული უეფას კონფერენს ლიგის საკვალიფიკაციო გათამაშებაში გადაინაცვლებს.
________________________
ფოტო: dinamo Batumi/facebook
ამავე თემაზე:
„დინამო ბათუმი“ ჩემპიონთა ლიგის საკვალიფიკაციო ეტაპზე რაზგრადის „ლუდოგორეცს“ შეხვდება
