“სტაბილურადაა და დღეს სავარაუდოდ გავწერთ. დაკვირვების ქვეშ იმყოფებოდა,” – უთხრეს “ბათუმელებს” ბათუმის რესპუბლიკურ საავადმყოფოში, სადაც პარაშუტიდან ჩამოვარდნილი კაცი მკურნალობს.
შემთხვევა გუშინ, 4 ივლისის საღამოს მოხდა.
ბათუმის სანაპირო ზოლზე, გასართობი პარაშუტიდან ცოლ-ქმარი ჩამოვარდა. ახალგაზრდა ქალი ადგილზე გარდაიცვალა, მისი გადარჩენა მაშველებმა ვერ შეძლეს, დაშავებული კაცი კი ბათუმის რესპუბლიკურ საავადმყოფოში მოათავსეს.
ცოლ-ქმარი უცხო ქვეყნის მოქალაქეები იყვნენ. ისინი ბათუმში დასასვენებლად ჩამოვიდნენ.
შინაგან საქმეთა სამინისტროს ინფორმაციით, გამოძიება მომხდარ ფაქტზე სისხლის სამართლის კოდექსის 275-ე მუხლით მიმდინარეობს, რაც საჰაერო ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს.
