“სპორტული საკლუბო გაერთიანება – ბათუმი” – ამ სახელწოდებით ახალი ა(ა)იპ-ის შექმნას მერია აპირებს. მერიაში ადასტურებენ, რომ ახალი სამსახური შტატების გაზრდას გამოიწვევს. აქვე არ აკონკრეტებენ, რამდენით გაიზრდება საშტატო ერთეული, თუკი საკრებულო მერიის ინიციატივას დაეთანხმება და სპორტული საკლუბო გაერთიანება შეიქმნება.
“ჩვენი მიზანია გვქონდეს მოქნილი მენეჯმენტი” – განაცხადა მერიის სპორტისა და ახალგაზრდობის განყოფილების უფროსმა, ია შალამბერიძემ, მერიის სპორტისა და ახალგაზრდობის განყოფილების ხელმძღვანელმა. ის საკრებულოს 4 აგვისტოს რიგგარეშე სხდომისთვის მოხსენებას ამზადებდა, მაგრამ საკრებულოს ბიურომ საკითხი დღის წესრიგიდან ამოიღო.
მერიის მიერ მომზადებული განკარგულების პროექტის მიხედვით, მერია მის დაქვემდებარებაში მყოფი 7 სპორტული კლუბის ლიკვიდიაციას აპირებს და ერთი ახალი ა(ა)იპ-ის ჩამოყალიბებას, რომელშიც სპორტული კლუბები გაერთიანდებიან.
“ახალი ადმინისტრაციული სტრუქტურა შეიქმნება, მაგრამ ეს არ გამოიწვევს ფინანსურ ცვლილებებს”, – ამბობს “ბათუმელებთან” ია შალამბერიძე. მისი განმარტებით, შრომითი კონტრაქტები სექტემბრისთვის ფორმდება. ამიტომ, ამ დროისთვის რთული გამოსათვლელია, რა შეიცვლება საშტატო ნუსხაში: “პირველ რიგში, ჩვენთვის მთავარია მივიღოთ თანხმობა საკრებულოსგან ცვლილებაზე. დანარჩენი დეტალურად შემდეგ გაიწერება… ჩვენი მიზანია ერთიანი ადმინისტრირება, რაც უფრო მოქნილს გახდის ამ კლუბების საქმიანობას. ჩვენი სურვილია გვქონდეს ერთიანი სისტემა, საქმის წარმოება, ერთიანი პიარი…”
“მხოლოდ იმის თქმა, რომ ადმინისტრირება იქნება ეფექტური და ფინანსური მართვა იქნება უფრო მოქნილი, ვიდრე აქამდე, არ არის საკმარისი არგუმენტი. წარმოდგენილი არ იყო კონკრეტული გათვლა” – გვითხრა ნინო ბერაძემ, საკრებულოს განათლების, კულტურის, ტურიზმის და სპორტის საკითხთა კომისიის თავმჯდომარემ. ამ კომისიის უმრავლესობამ მიმართა საკრებულოს ბიუროს რეკომენდაციით, არ გავიდეს საკითხი საკრებულოს სხდომაზე, ვიდრე პროექტი სრულყოფილი სახით არ იქნება წარმოდგენილი. ბიურომ კომისიის რეკომენდაცია ამ ეტაპზე გაიზიარა.
“გათვლებიც რომ იყოს წარმოდგენილი, ერთ ქოლგაში 5 შპს-ს და 2 ა(ა)იპ-ის გაერთიანება მაინც არამიზნობრივად მიმაჩნია, – ამბობს ნინო ბერაძე – როცა სპორტული კლუბი არის შპს, მას აქვს დამოუკიდებლად განვითარების საშუალება, იმის პირობა, რომ მუდმივად მუნიციპალური დაფინანსების იმედად არ იყოს. ერთ მუნიციპალურ ა(ა)იპ-ში ამ კლუბების გაერთიანება მათ დამოუკიდებლად განვითარების მოტივაციას დაუკარგავს“.
“ვერ დავეთანხმები ამ შეხედულებას. თუკი გამოჩნდება ინვესტორი, რომელიმე ა(ა)იპ-ი შეიძლება გამოეყოს გაერთიანებას და ცალკე განვითარდეს,” – ამბობს ია შალამბერიძე.
გაერთიანებული კლუბებისთვის მერიას ახალი ადმინისტრაციული შენობაც შეურჩევია – აეროპორტის გზატკეცილზე მერიის გამგეობის შენობა: “იმ შენობაში არის იმის რესურსი, რომ გაერთიანებული კლუბების ერთიანი ადმინისტრაცია მოთავსდეს. მოდელი, რომელიც ჩვენ შევიმუშავეთ, სხვადასხვა კლუბების ერთგვაროვანი შესყიდვების ხარჯებსაც შეამცირებს, მაგალითად, საოფისე ხარჯებს…” – გვითხრა ია შალამბერიძემ.
ამ დროისთვის უცნობია, როდის მიმართავს ხელახლა მერია საკრებულოს სპორტული კლუბების გაერთიანების მოთხოვნით და შეიცვლება თუ არა განკარგულების პროექტი, რომელიც მერიაში ახალი ორგანიზაციული ერთეულის ჩამოყალიბებას ისახავს მიზნად.
