ბათუმის საკრებულო თუკი შესაბამის ინიციატივას ხვალ, 4 აგვისტოს რიგგარეშე სხდომაზე მხარს დაუჭერს, ბათუმის საკრებულოს სპეციალური წარმომადგენელი სასამართლოში აღარ ეყოლება. საკრებულოს იურისტი, სულიკო შვენთიძე “ბათუმელებთან” ამბობს, რომ ცვლილების მიზეზი მიწის საკუთრების აღიარების კომისიაა, რომელიც საკრებულოს ნაცვლად, პირველი აგვისტოდან მერიას ექვემდებარება.
“საკრებულოს წინააღმდეგ სასამართლო დავა იშვიათია. ძირითადად დავა უკავშირდებოდა მიწის საკუთრების აღიარებას და რადგან ეს კომისია მერიაში გადავიდა, უმჯობესია, იურისტის შტატიც მერიას დაემატოს. საჭიროების შემთხვევაში, მერიის იურისტი დაიცავს საკრებულოს ინტერესს. ეს კანონთან წინააღმდეგობაში არ მოდის, თვითმმართველობის ახალი კოდექსი პირდაპირ ითვალისწინებს ამას,” – ამბობს სულიკო შვენთიძე.
საკრებულოს ინტერესებს აქამდე საერთო სასამართლოებში დავით ჯაიანი იცავდა. ცვლილების შემთხვევაში,დავით ჯაიანთან ერთად, საკრებულოს აპარატის კიდევ ერთი იურისტი, ბაკურ ბოლქვაძე გადავა მერიაში სამუშაოდ.
