მთავარი,სიახლეები

პოლიციის შენობაში მოქალაქის სავარაუდო ფიზიკურ ანგარიშსწორებაზე გამოძიება დაიწყო

01.08.2016 • 1664
პოლიციის შენობაში მოქალაქის სავარაუდო ფიზიკურ ანგარიშსწორებაზე გამოძიება დაიწყო

ირაკლი ქაჯაიას საქმეზე, „ბათუმელების“ ინფორმაციით, პროკურატურის საგამოძიებო ნაწილმა გამოძიება დაიწყო. გამომძიებელი დროებითი მოთავსების იზოლატორში დღეს, პირველ აგვისტოს, დაკითხავს ირაკლი ქაჯაიას, რომელმაც ” ბათუმელებს” იზოლატორში მოთავსებამდე უთხრა, რომ 26 ივლისს პოლიციის მე-6 განყოფილებაში ფიზიკურად გაუსწორდნენ.

დღესვე “ბათუმელებს” შინაგან საქმეთა სამინისტროს პრესსამსახურში უთხრეს, რომ საქმის მასალები გენერალურმა ინსპექციამ პროკურატურაში გადააგზავნა. 26 ივლისიდან დღემდე პროკურატურამ არ მოგვაწოდა ინფორმაცია გამოძიების დაწყების შესახებ. ირაკლი ქაჯაიას საქმეზე გამოძიების დაწყება “ახალგაზრდა იურისტთა ასოციაციის” იურისტმა, პაატა დიასამიძემ დაგვიდასტურა, რომელმაც დღეს მოინახულა იზოლატორში ირაკლი ქაჯაია.

საიას იურისტმა დროებითი მოთავსების იზოლატორის ადმინისტრაციას უკვე მიწერა წერილი და მოითხოვა სამართალმდამრღვევად ცნობილი ირაკლი ქაჯაის საავადამყოფოში გადაყვანა, რადგან მისი ჯანმრთელობის მდგომარეობა მძიმეა. ადმინისტრაციას მოთხოვნაზე პასუხი ჯერ არ გაუცია. გუშინ, იზოლატორში მოთავსებიდან რამდენიმე საათში, ირაკლი ქაჯაია სახალხო დამცველის წარმომადგენელმა, ციალა ქათამიძემ მოინახულა და თქვა, რომ ქაჯაიას მხოლოდ ტკივილგამაყუჩებელი გაუკეთეს.

“ბათუმელებმა” ირაკლი ქაჯაიას შესახებ სტატია დღეს, პირველ აგვისტოს გამოაქვეყნა. სტატიაში ასახულია დოკუმენტები, რომლის მიხედვითაც ირაკლი ქაჯაია პოლიციის შენობაში ფიზიკური დაზიანებების გარეშე შევიდა. სამართალდამცველების მიერვე გაფორმებული ოქმებით დგინდება, რომ ირაკლი ქაჯაია პოლიციის შენობიდან პირდაპირ ბათუმის რეფერალურ საავადმყოფოში გადაიყვანეს, სადაც მას ნეკნის მოტეხილობა დაუდგინეს. საავადმყოფოდან ირაკლი ქაჯაია დროებითი მოთავსების იზოლატორში მოათავსეს. გუშინ, 31 ივლისს, ირაკლი ქაჯაიას 7 დღით ადმინისტრაციული პატიმრობა შეუფარდა მოსამართლე სალიხ შაინიძემ წვრილმანი ხულიგნობისა და პოლიციელებისთვის წინააღმდეგობის გაწევის გამო.

გადაბეჭდვის წესი


ასევე: