ევროპის ჩემპიონატზე თურქეთის ეროვნული ნაკრების წინააღმდეგ დრამატული სადებიუტო მატჩის შემდეგ, საქართველოს ნაკრები ჯგუფური ეტაპის მეორე ტურში ჩეხეთის ნაკრებს დაუპირისპირდება.
საქართველოსა და ჩეხეთის ნაკრებების შეხვედრა შაბათს, 22 ივნისს, ჰამბურგში, „ვოლკსპარშტადიონზე“ შედგება. მატჩი საქართველოს დროით 17:00 საათზე დაიწყება.
აღსანიშნავია, რომ ჩეხეთის საფეხბურთო ნაკრებს საქართველოს ნაკრები არსებობის მანძილზე პირველად ეთამაშება.
როგორც ცნობილია, საქართველოს ნაკრები F ჯგუფში თურქეთის, ჩეხეთისა და პორტუგალიის ნაკრებებთან ერთად ასპარეზობს. პირველი ტურის შემდეგ ჯგუფს თურქეთის ნაკრები ლიდერობს ერთი მოგებით, 3 ქულითა და ბურთების უკეთესი შეფარდებით. ჩვენი ჯგუფის და ზოგადად ტურნირის ფავორიტ პორტუგალიის ნაკრებსაც 3 ქულა აქვს, მაგრამ ერთით ნაკლები ბურთი გაუტანა ჩეხეთის ნაკრებს პირველ ტურში, ვიდრე საქართველოს – თურქეთმა. შესაბამისად, მესამე ადგილს პირველი ტურის შემდეგ იჭერს ჩეხეთის ნაკრები ორი გაშვებული ბურთით და ბოლო, მე -4 ადგილზე ჯერჯერობით საქართველოს ნაკრებია გაშვებული სამი გოლით.
სატურნირო მდგომარეობა ჩვენს ჯგუფში პირველი ტურის შემდეგ
მიუხედავად წაგებული თამაშისა, საქართველოს ნაკრები შემდეგ ეტაპზე გასვლის რეალურ შანსს ინარჩუნებს.
- მოკლედ ჩეხეთის ეროვნული ნაკრების შესახებ
მართალია 18 ივნისს ჩეხეთის ნაკრები პორტუგალიის ეროვნულ ნაკრებთან მინიმალური სხვაობით (1-2) დამარცხდა, მაგრამ ჩეხები კარგ ფორმაში არიან, ისინი მანამდე ზედიზედ 7 შეხვედრაში არ იყვნენ დამარცხებულები.
ჩეხეთის ნაკრების გუნდის ლიდერები ტოპ – ჩემპიონატებში თამაშობენ ( სერია ა, პრემიერლიგა, ბუნდესლიგა), მუდმივი სათამაშო პრაქტიკა აქვთ და კარგ ფორმაშიც იმყოფებიან. ნაკრები მონაწილეობდა ევროპის წინა ჩემპიონატზე, გააღწია ჯგუფიდან და მერვედფინალიდან საკმაოდ ძლიერი ნიდერლანდების ნაკრები გამოთიშა, ხოლო მეოთხედფინალში დანიასთან დამარცხდა და ჩემპიონატი დატოვა.
22 ივნისს, 20:00 საათზე გაიმართება ევროპის ჩემპიონატის F ჯგუფის ლიდერების: თურქეთისა და პორტუგალიის ნაკრებების შეხვედრა.
