20 ივნისს, ბათუმში, სასტუმრო „შერატონში“ დასაქმების ფორუმი გაიმართება – ინფორმაციას საქართველოს ჯანდაცვის სამინისტრო ავრცელებს.
ფორუმში, რომელიც 14 საათზე დაიწყება, მონაწილეობას მიიღებს სხვადასხვა სფეროში მოქმედი 70-მდე კომპანია აჭარიდან.
სამინისტროს ინფორმაციით, ფორუმზე 2000-ზე მეტი ვაკანსია იქნება წარმოდგენილი.
„მოქალაქეებს შესაძლებლობა აქვთ, არსებული კვალიფიკაციის და სასურველი დასაქმების ხანგრძლივობის შესაბამისად შეარჩიონ სამუშაო ადგილები ადმინისტრაციული, მომსახურების, სავაჭრო, დისტრიბუციის, სასტუმრო და სარესტორნო, სამრეწველო, სატრანსპორტო, ლოჯისტიკური, სამშენებლო, საფინანსო, სადაზღვევო, ჯანდაცვის და განათლების სფეროებიდან“ – იუწყება სამინისტრო.
ფორუმი დასაქმების ხელშეწყობის სახელმწიფო სააგენტოს, აჭარის დასაქმების სააგენტოსა და ბათუმის შოთა რუსთაველის სახელმწიფო უნივერსიტეტის ერთობლივი თანამშრომლობით იმართება.
