თურქეთი „ევრო 2024-ზე“ თურქულ-გერმანული საზოგადოებისგან დიდ მხარდაჭერას ელის – წერს თურქული გამოცემა „ჰურიეთი“. გამოცემა მიუთითებს, რომ გერმანიაში ბევრი თურქი ცხოვრობს ჯერ კიდევ ცივი ომის შემდგომი პერიოდიდან.
თურქეთის ნაკრები F ჯგუფის პირველ ორ მატჩს დორტმუნდში საქართველოსა და პორტუგალიის წინააღმდეგ გამართავს, რასაც მოჰყვება მატჩი ჰამბურგში, ჩეხეთის წინააღმდეგ.
„ჰურიეთი“ წერს, რომ ორივე ქალაქში მრავალრიცხოვანი თურქული დიასპორაა, რაც ადგილობრივ მხარდაჭერას უზრუნველყოფს.
გამოცემა აღნიშნავს, რომ თურქეთი „ევრო 2024-ზე“ ფრთხილი ოპტიმიზმით გადის 2021 წლის იმედგაცრუებული თამაშის შემდეგ, სადაც გუნდმა სამივე თამაში წააგო და მხოლოდ ერთი გოლი გაიტანა.
„ძირითადი მოთამაშეები არიან მილანის „ინტერის“ კაპიტანი ჰაკან ჩალჰანოღლუ და 19 წლის ვუნდერკინდი არდა გიულერი მადრიდის „რეალიდან“ – წერს „ჰურიეთი“ და სტატიაში აღნიშნავს, რომ საქართველოს დებიუტი აქვს დიდ ტურნირზე და ნაკრებს „ვარსკვლავი ხვიჩა კვარაცხელია ხელმძღვანელობს, შინ პოლიტიკური არეულობის ფონზე“.
ხვალ, 18 ივნისს, საქართველოს ნაკრები თურქეთის ნაკრებთან ითამაშებს. მატჩი საღამოს 8-ზე დაიწყება.
საქართველოს ნაკრების ცნობით, ხვალ, 18 ივნისს, 11:00 საათიდან, თურქეთი-საქართველოს მატჩის დაწყებამდე, დორტმუნდში, ვესტ პარკში საქართველოს გულშემატკივრები შეიკრიბებიან, 14:00 საათიდან კი დაიწყება მსვლელობა დორტმუნდის სტადიონისკენ, სადაც მატჩი გაიმართება.
____________
ფოტოზე: საქართველოს ნაკრები ვარჯიშზე გერმანიაში. ფოტო: საქართველოს ნაკრები/facebook
- ამავე თემაზე:
ბათუმში საქართველოს ნაკრების თამაშს ღია ცისქვეშ ორ ადგილას შეგიძლიათ უყუროთ
