მას შემდეგ რაც ბათუმის რუსთაველის სახელმწიფო უნივერსიტეტის რექტორმა ხელი მოაწერა 38 უნივერსიტეტის ერთობლივ განცხადებას, სადაც ნათქვამი იყო, რომ პოლიტიკური პროცესები არ უნდა აისახოს უნივერსიტეტების ფუნქციონირებაზე, ბათუმში სტუდენტური მოძრაობის წევრებმა ბსუ-ს რექტორს, მერაბ ხალვაშს ხელმოწერის უკან გამოთხოვა და ბოდიშის მოხდა მოსთხოვეს.
სტუდენტები ასევე მოითხოვდნენ, შეკრებილიყო აკადემიური საბჭო და ემსჯელათ რექტორის ერთპიროვნულ გადაწყვეტილებაზე და მათთვის მიეცათ უფლება, დასწრებოდნენ აკადემიური საბჭოს სხდომას.
„ასევე, მოვითხოვთ გარანტიას, რომ გაფიცულ სტუდენტებს ექნებათ შესაძლებლობა, აღადგინონ გაცდენილი ლექციები, სემინარები და გამოცდები“- აცხადებდნენ სტუდენტური მოძრაობის წევრები, რომლებიც რუსული კანონის გამო 13 მაისის შემდეგ გაფიცულები არიან და ამ დრომდე საპროტესტო აქციებს მართავენ ბათუმში.
„ბათუმელები“ ბსუ-ს ადმინისტრაციას დაუკავშირდა და ჰკითხა, აპირებენ თუ არა სტუდენტების მოთხოვნების შესრულებას და რა პროცესშია მოლაპარაკებები.
უნივერსიტეტის პრესსამსახურმა ჩვენს კითხვებს წერილობით ნაწილობრივ უპასუხა.
„ლექცია-სემინარების აღდგენასთან დაკავშირებით, რექტორი შეთანხმდა სტუდენტებთან. აღდგენა მოხდება გონივრულ ვადაში. ველოდებით სტუდენტების განცხადებებს, რის საფუძველზეც დაიწყება აღდგენების გრაფიკისა შედგენა, მათი ინტერესების მაქსიმალური გათვალისწინებით“ – აცხადებენ უნივერსიტეტში.
რაც შეეხება აკადემიური საბჭოს მოწვევას და მსჯელობას რექტორის ხელმოწერაზე, უნივერსიტეტის ადმინისტრაციიდან ასევე გვიპასუხეს, რომ „მზადდება პასუხი და წერილობით ეცნობება განცხადების ავტორებს“.
_______________
ფოტოზე: „არა რუსულ კანონს“ – აქცია ბსუ-სთან
