ადამიანის უფლებადამცველი ანა არგანაშვილი, რომელიც წლებია ძალადობის მსხვერპლი ბავშვებისა და ქალების უფლებებს იცავს, „ქართული ოცნების“ მიერ ინიციირებულ რუსულ კანონს ეხმაურება და წერს, თუ რამდენად დიდ ზიანს მიაყენებს ეს კანონის ადამიანის უფლებების სფეროს და რამდენ ადამიანს დატოვებს დაუცველად.
„რატომ ვართ მე და ჩემი თანამშრომელი ადვოკატები უცხო ქვეყნის აგენტები?
იმიტომ, რომ ხვალ დილის 6 საათზე უნდა ავდგე, 7 საათზე უკვე გზაში ვიყო, რაიონის სასამართლო პროცესზე შევვარდე 12 საათზე, იქ ადამიანი, რომელიც ფსიქიატრიულში უკანონოდ ჩაკეტეს – დავიცვა.
იმავე დღეს, უკან უნდა წამოვიდე. აქ რომ ჩამოვალ კიდევ უნდა ვიმუშაო.
დღეს ბავშვის სექსუალური შევიწროების პროცესზე უნდა გავიდე, იქ შემვიწროებელმა გვლანძღოს ადვოკატები და ბავშვი, ჩვენ თან ბავშვს ყურებზე ხელი უნდა დავაფაროთ, რომ არ მოისმინოს.
თან პროცესი მოვიგოთ, თან სასამართლოს ძალით, განათლების სამინისტროს დავავალოთ სექსუალური შევიწროების მექანიზმი დანერგოს და სხვა ბავშვები დავიცვათ.
ასე დაუსრულებლად, – თან მლანძღონ, თან ვირბინო, თან დავიცვა, თან გადარჩენისთვის ვიბრძოლო.
ანუ „ძალა“, რომელიც საშუალებას მაძლევს ძალადობის მსხვერპლს მოვუსმინო, უსამართლობაში მარტო არ დავტოვო და უთანასწორო ბრძოლაში შევყვე – უცხოა და პარლამენტი, რომელიც გადასულია მარტო პოლიტიკური ქულების დაწერაზე – ნაცნობი.
აი ეს არის უმადურობა, ბოლო 10 წელია ასე დავრბივარ.
რომელი პარლამენტარი დარბის ჩვენსავით რაიონიდან რაიონში ადამიანების დასაცავად? რომელზე იწყება მათი დღე და ყავას სად სვამენ? ჩვენ – გორის „სმარტში“- წერს ანა არგანაშვილი.
ანა არგანაშვილი ამჟამად ერთ-ერთ საერთაშორისო ორგანიზაციაში მუშაობს, ასევე თანამშრომლობს ორგანიზაციასთან „პარტნიორობა ადამიანის უფლებებისთვის“, სადაც წლების განმავლობაში მუშაობდა, მათ შორის ხელმძღვანელ პოზიციაზე და იცავდა ადამიანების უფლებებს. ის ახლაც აგრძელებს საადვოკატო საქმიანობას ადამიანის უფლებების სფეროში.
მის სახელზე არაერთი მოგებული საქმეა, მათ შორის შშმ ბავშვების განათლების, ჯანმრთელობის უფლების დაცვის და ბავშვების სექსუალური შევიწროების საქმეებზე.
ამავე თემაზე:
რატომ ვერ ხედავს სახელმწიფო ბავშვთა უფლებების დარღვევას ტრაგედიამდე – ინტერვიუ
„სახელმწიფოს მათთვის არ სცალია“ – ინტერვიუ ბავშვებზე აფრიკის დასახლებიდან
