„ანაფორიან ღ…. მილიონები!!! მშიერ მოსწავლეებს მარხვა???“ – ეს წარწერა მოქალაქე ვაჟა თავართქილაძემ ბათუმში, საკუთარი საშაურმეს ვიტრინაზე დღეს, 22 მარტს გამოაკრა.
მოქალაქე ხელისუფლების გადაწყვეტილებას აპროტეტს, რომლის მიხედვითაც საპატრიარქოს ბიუჯეტიდან ყოველწყლიური 25 მილიონის გარდა, დამატებით 35 მილიონი ლარი გამოუყვეს.
„ოცნება“ ყიდულობს ეკლესიის კეთილგანწყობას, რათა ამ უკანასკნელმა იმუშაოს მრევლზე სახელისუფლებო პარტიისთვის ხმების მისაცემად. ეს არის აშკარა წინასაარჩევნო მოსყიდვა,“ – მიიჩნევს მოქალაქე ვაჟა თავართქილაძე.
ეს ის კაცია, რომელმაც ბათუმში, გორგილაძის ქუჩის დასაწყისში მდებარე, საკუთარი საშაურმის ვიტრინაზე გასულ წელს გამოაკრა განცხადება: „ბათუმის ზონდერი მერი ხალხის მტერი“. კონსტიტუციით გარანტირებული გამოხატვის თავისუფლებით სარგებლობისთვის ეს მოქალაქე მოსამართლე ალექსანდრე გოგუაძემ 1000 ლარით დააჯარიმა. მოსამართლემ პროტესტის გამოხატვა რომ უკანონოდ დააჯარიმა, ეს სააპელაციო სასამართლომ დაადასტურა.
„ქართული ოცნება“ და საპატრიარქო, ორივე კრემლიდან იმართება, ორივე ანტისახელმწიფოებრივ საქმიანობას ეწევა, ანტიეროვნულს,“ – აცხადებს ვაჟა თავართქილაძე და ყურადღებას ამახვილებს სოციალურ პრობლემებზე, რაზეც ხელისუფლება უნდა ზრუნავდეს.
„ეს რომ იყოს კეთილი განზრახვა, ის უფრო საჭირბოროტო და მტკივნეულ საკითხებს დააფინანსებდა, იზრუნებდა თუნდაც მშიერი ხალხის დაპურებაზე, ხელფასების და პენსიების გაზრდაზე, მედიკამენტებზე, რასაც ადამიანები სიძვირის გამო ვერ ყიდულობენ.
მინდა, ხელისუფლებამ, პირველ რიგში, სკოლებში მოსწავლეების კვებაზე იზრუნოს, რადგან ბევრი ბავშვი მშიერია.
საპატრიარქოსთვის დაფინანსების გაზრდა იმის მანიშნებელია, რომ ხელისუფლების ყველა საქციელი ხალხის თვალში გაშიფრულია – ჩვენ ყველაფერს ვხდებით, როგორ არაღირსეულად გვექცევა ხელისუფლება, ის გვიტარებს უგულებელყოფის პოლიტიკას,“ – უთხრა ვაჟა თავართქილაძემ „ბათუმელებს“.
მოქალაქის ახალი წარწერა გორგილაძის ქუჩაზე მდებარე საშაურმის ვიტრინაზე
