„ბათუმის ავტოტრანსპორტის “ დირექტორის ინფორმაციით, ბათუმში ელექტროავტობუსების შემოყვანის საკითხი ჯერ გადაწყვეტილი არ არის.
„ჩვენ გვქონდა წინადადება ევროპის რეკონსტრუქციისა და განვითარების ბანკთან, რომ გაგვეკეთებინა ერთი საცდელი ხაზი ელეტრონული ავტობუსების, დანარჩენი კი, ევრო 5 დიზელის სტანდარტზე მომუშავე ავტობუსები შეგვეძინა. დასკვნები, რაც ბანკისგან მივიღეთ, არის კონფიდენციალური და ვერ გავასაჯაროვებთ მანამ, სანამ ოფიციალური თანხმობა არ გვექნება“ -გვეუბნება „ბათუმის ავტოტრანსპორტის“ დირექტორი პაატა დუმბაძე.
მისი ინფორმაციით, სესხის გამოყოფამდე ბანკმა ჯერ ბათუმის რელიეფი და გარემო პირობები უნდა შეისწავლოს, თუ რამდენად შეესაბამება ელექტროავტობუსებს. „იმის შემდეგ, როცა გვექნება დადასტურება, დავაანონსებთ. ჯერ ადრეა ამაზე საუბარი“.
იმ შემთხვევაში, თუკი ევროპის რეკონსტრუქციისა და განვითარების ბანკი „ბათუმის ავტოტრანსპორტის“ წინადადებას მიიღებს, სესხის ფარგლებში ათი ერთეული ელეტროავტობუსის შესყიდვა მოხდება. თუმცა, სესხის ოდენობას ავტოტრანსპორტის დირექტორი, ამ დროისთვის არ ასაჯაროვებს.
„სექტემბრის 15-მდე უნდა გვქონდეს ბანკის პასუხი. თანხმობის შემთხვევაში დეტალებს გავახმაურებთ“ – გვეუბნება პაატა დუმბაძე.
