Batumelebi | კაზინოს ყოფილი თანამშრომლის საქმე სასამართლოში კაზინოს ყოფილი თანამშრომლის საქმე სასამართლოში – Batumelebi
RU | GE  

კაზინოს ყოფილი თანამშრომლის საქმე სასამართლოში

პეტრო განჯა სასამართლოში კაზინო „რედისონ ივერიას“ ედავება. ის სამსახურში აღდგენას და განაცდური ხელფასის სრულ ანაზღაურებას მოითხოვს. მასთან კაზინოს ადმინისტრაციას ხელშეკრულება 2019 წლამდე ჰქონდა გაფორმებული, თუმცა იგი მიმდინარე წლის თებერვალში შეწყდა. ადმინისტრაციის განმარტებით, პეტრო განჯა გათავისუფლებამდე ერთი კვირის განმავლობაში უმიზეზოდ არ გამოცხადდა სამსახურში.

პეტრო განჯას თქმით კი, კაზინოს ადმინისტრაციამ მას 27 იანვარს უთხრა, რომ სამსახურში აღარ უნდა მისულიყო. „მისთვის არაფერი განუმარტავთ და იმ დღეს არც ბრძანება ჩაუბარებიათ“, – გვიყვება ადვოკატი ლელი ბჟალავა: „მეორე დღესვე პეტრო დამიკავშირდა და მთხოვა, სარჩელის მომზადებაში დამეხმარეო. მაშინ კაზინოდან კიდევ სამი თანამშრომელი გამოუშვეს, მაგრამ დღეს მოწმის სახით ჩვენების მიცემა არავის უნდა, ყველა დაშინებულია, რადგან არსებობს ე.წ. შავი სიები, იქ მოხვედრა საერთოდ დაუსაქმებლობას ნიშნავს სხვა კაზინოში. პეტროსაც ეს უთხრეს, თუ არ გაჩერდები, ისე ვიზამთ, ვერსად დასაქმდებიო. არადა, მას მხოლოდ ამ სექტორში აქვს 14-წლიანი გამოცდილება. გაუგებარია, რის გამო არ შეიძლება მისულიყო უმიზეზოდ პეტრო სამსახურში, როცა ის სპეციალურად ამ საქმისთვის არის ჩამოსული უკრაინიდან საქართველოში და ნაქირავებ ბინაში ცხოვრობს”.

„რა მტკიცებულება ადასტურებს პეტროს იძულებით სამსახურიდან გაშვებას?” – კითხვაზე ადვოკატმა გვიპასუხა, რომ მტკიცებულება 8 თებერვალია, როცა პეტროს გათავისუფლების შესახებ ბრძანება ოფიციალურად ჩაბარდა და იმავე დღეს მან სასამართლოს მიმართა: „წინა დღეებში პრობლემა რომ არ ჰქონოდა პეტროს, სარჩელის მომზადებას ხომ არ დავიწყებდით? ერთ დღეში კი სარჩელს ვერ მოვამზადებდით, ფაქტია“ – ამბობს ადვოკატი ლელი ბჟალავა.

შრომით დავას ბათუმის საქალაქო სასამართლოში მოსამართლე სალიხ შაინიძე განიხილავს.

ნეტგაზეთის მასალების სხვა გამოცემებში გადაბეჭდვის წესი
ავტორი