ბათუმში, თამარ მეფის გამზირზე, მახინჯაურის ცენტრის საგზაო ინფრასტრუქტურის რეაბილიტაციისთვის ქალაქის ბიუჯეტიდან 1 მილიონი ლარია გამოყოფილი. გზის სარეაბილიტაციო მონაკვეთის სიგრძე 595 მეტრია.
ბათუმის მერიის საქალაქო ინფრასტრუქტურისა და კეთილმოწყობის სამმართველომ სამუშაოების შესყიდვაზე ტენდერი უკვე გამოაცხადა. წინადადებების მიღება 2024 წლის 21 მარტს დაიწყება და 26 მარტს დასრულდება.
ტენდერის პირობის მიხედვით, სამუშაოები 2024 წლის 21 ივნისამდე უნდა დასრულდეს.
მახინჯაურის ცენტრში გამავალი გზა ქობულეთის მხრიდან ბათუმში შემომავალი ერთადერთი ავტომაგისტრალის ნაწილია. მოუწესრიგებელი საგზაო ინფრასტრუქტურის პარალელურად, წვიმის დროს აღნიშნული ტერიტორია ხშირად იტბორება, რაც ტრანსპორტის მოძრაობის პარალიზებას იწვევს.
პროექტის მიხედვით, სამუშაოები სანიაღვრე სისტემის [წყალმიმღები ჭების და სხვ.] მოწყობასაც ითვალისწინებს.
მახინჯაურის ცენტრი. წითელი ფერით აღნიშნულია ის ტერიტორია, სადაც საგზაო ინფრასტრუქტურის მოსაწყობად 1 მილიონი ლარია გამოყოფილი ბათუმის ბიუჯეტიდან / ფოტო ტენდერიდან
„დღეის მდგომარეობით არსებულ გზაზე არ არის მოწესრიგებული ინფრასტრუქტურა, ქვეითების და საავტომობილო მოძრაობა ქაოსურია და საშიშროებას უქმნის როგორც ქვეითებს ასევე ავტოტრანსპორტს.“ – აღნიშნულია პროექტში.
პროექტით, გზის სავალ ნაწილზე კვლავ ასფალტის საფარს დააგებენ, გააკეთებენ ტროტუარებს იმ ადგილებში სადაც არ არის; მოაწყობენ ბორდიურებს, ლითონის მოაჯირებს, ე.წ. კუნძულებს გზის სავალ ნაწილზე, დაიხაზება ზებრა გადასასვლელები ქვეითებისთვის, დაამონტაჟებენ შუქნიშანს, მოაწყობენ გარეგანათებას.
რეაბილიტაციისას ტრანსპორტისთვის გზა სრულად არ ჩაიკეტება. პროექტში აღნიშნულია, რომ სამუშაოების მიმდინარეობისას დაწესდება მოძრაობის სპეციალური რეჟიმი და განთავსდება შესაბამისი დროებითი საგზაო ნიშნები.
შესრულებული სამუშაოების საგარანტიო პერიოდი შეადგენს 12 თვეს; გარე განათებაზე საგარანტიო პერიოდი კი – 48 თვეს.
„ტენდერში მონაწილე პრეტენდენტს 2021 წლიდან ტენდერის გამოცხადების დღემდე შესრულებული უნდა ჰქონდეს ტენდერით გათვალისწინებული ანალოგიური ხასიათის, სირთულისა და შინაარსის (საავტომობილო გზების, ქუჩების მშენებლობა ან/და რეკონსტრუქცია ან/და მოდერნიზაცია ან/და რეაბილიტაცია) სამუშაოები საერთო ღირებულებით არანაკლებ 3 მილიონი ლარის ოდენობით; აქედან საერთო ღირებულებით არანაკლებ 1 მილიონი ლარის სამუშაოები ერთი ხელშეკრულების ფარგლებში“ – აღნიშნულია ტენდერის პირობაში.
