მთავარი,სიახლეები

„გეი მეგობრები მყავს“ – რა „ცოდვაზე“ ლაპარაკობს უმაღლესი საბჭოს წევრი და რას ეძახის პროპაგანდას

05.03.2024 • 3771
„გეი მეგობრები მყავს“ – რა „ცოდვაზე“ ლაპარაკობს უმაღლესი საბჭოს წევრი და რას ეძახის პროპაგანდას

„ქართული ოცნების“ ინიციატივაზე მიიღოს ჰომოფობიური კანონპროექტი, აჭარის უმაღლესი საბჭოს წევრმა, ცოტნე ანანიძემ კომენტარისას მსგავსი რამ თქვა: „მიდგომა იქნება კონსტიტუციური და ქრისტიანული – ებრძვი ცოდვას და არა ცოდვილს“.

რა ცოდვაზე საუბრობს უმაღლესი საბჭოს წევრი და რას მიიჩნევს პროპაგანდად? – ამ თემაზე „ბათუმელები“ ცოტნე ანანიძეს ესაუბრა.

  • ბატონო ცოტნე, რა ცოდვაზე საუბრობდით, ვის მიიჩნევთ ცოდვილებად და რა შუაშია „ცოდვა“ კანონპროექტთან, რომლის მიღებაც გინდათ „ქართული ოცნების“ წევრებს?

სახელმწიფო, კანონმდებელი, ხელისუფლება არ აფასებს ცოდვას და ასე შემდეგ. ეს არის რელიგიური ორგანიზაციების და შესაძლებელია, მრევლის უფლება.

დანარჩენ შემთხვევაში, აბსოლუტურად არ გულისხმობს ვიღაცის ცოდვის შეფასების ნაწილს, უბრალოდ ეს არის კონტექსტი, რომელიც ბმაშია რეალობასთან.

  • ეკლესია და ქრისტიანობა რა შუაშია ამ კანონპროექტთან?

ეს არის რელიგიური ორგანიზაციების დამოკიდებულების ნაწილი, ზოგადად და ეს არის ერთ-ერთი მესიჯი, რომ ეს ადამიანები (ლგბტქ) არ იყვნენ თავდასხმის ობიექტები. ყველა კონტრაქცია, რაც კი განხორციელებულა, რელიგიური სარჩული ჰქონდა, ხომ?

ეს, ჩემი აზრით, პირველ რიგში არის გზავნილი იმ ადამიანების მიმართ, რომ არ შეიძლება, ეს გახდეს (ლგბტქ-ზე) ბრძოლის ან ძალადობის საფუძველი.

ეს არის ჩემი აზრით, ის კონცეფციური ხედვა და ეს გულისხმობს, რომ არ არსებობს საფუძველი, რომ კონკრეტულ ადამიანს ებრძოლო იმის გამო, რომ ის განსხვავებულია, მიუხედავად იმისა, ხართ თუ არა მორწმუნე.

რწმენა და აღმსარებლობა არის ადამიანის აბსოლუტური უფლება. ხელშეუხებელია, მაგრამ მრევლს აქვს კონსტიტუციური უფლება ჩათვალოს ასე. ვერ წაართმევ გამოხატვის თავისუფლებასაც, რომ რაღაც არის ცოდვა და ამ ცოდვას ებრძვის.

  • მრევლის პოზიცია გასაგებია, ამაზე არ ვსაუბრობთ, ჩვენ გვაინტერესებს თქვენი პოზიცია ამ საკითხზე, რას გულისხმობთ ლგბტქ პროპაგანდასა და რეკლამირებაში?

არაფერი ჯერ გამოკვეთილი არ არის. საპარლამენტო უმრავლესობის მხრიდან გარკვეული შეთავაზება იყო ოპოზიციასთან და სამოქალაქო სექტორთან, რომ ვისაუბროთ პროპაგანდირებაზე და რეკლამირებაზე.

აქ იყო მაგალითიც მოყვანილი, რომ ისეთი კონტენტი, რომელიც გათვლილია არასრულწლოვნებზე და რომელიც შესაძლოა გავიდეს ვიდეო ან ბეჭდური სახით.

  • ასეთ კონტენტს ვინმე ქმნის საქართველოში? პირადად თქვენ თუ გინახავთ სადმე.

არის ინტერნეტში ხელმისაწვდომი, ჩვენც შეგვიძლია ეს მოვძებნოთ…

ეს აკრძალულია კანონითაც, იმის მიუხედავად, ეხება ეს უმცირესობას თუ არა.

  • თქვენ როგორც საკანონმდებლო ორგანოში დასაქმებულ პირს, როგორ წარმოგიდგენიათ ლგბტქ კონტენტის აკრძალვა, რას უჭერთ მხარს და რას არა?

ჯერ ჩამოყალიბებული ნორმები არ არის ამ კუთხით. როცა სამუშაო ვერსია იქნება კანონპროექტის წარმოდგენილი, ამის შემდეგ უფრო მარტივი იქნება ამაზე საუბარი, მაგრამ რა თქმა უნდა, გამორიცხულია, რომ არაკონსტიტუციური იყოს კანონი. ეს შეუძლებელია.

ნორმატიული აქტების იერარქიას ვგულისხმობ. პირველ რიგში უნდა იყოს კონსტიტუციასთან შესაბამისობაში ნებისმიერი აქტი და პირველ რიგში გულისხმობს კონსტიტუციის მეორე თავის პრინციპებთან –  თანასწორობასთან იყოს შესაბამისობაში. ეს არის ყველაზე მთავარი, მაღალი დაცვა  ნებისმიერი ადამიანის.

  • ამ თქვენი ინიციატივით, ვის იცავთ და რისგან?

მე ვგულისხმობ, თუ საფრთხე არსებობს ქვიარ ადამიანთან მიმართებით. ეს ინიციატივა, თქვენ ფიქრობთ, რომ დაარღვევს ქვიარ ადამიანების უფლებებს?

  • მე რატომ მეკითხებით. თქვენ უნდა უპასუხოთ ამ კითხვას. თქვენი პარტიის ხელმძღვანელი საუბრობს ლგბტქ პროპაგანდის აკრძალვაზე. ახლა განმარტეთ, რას ნიშნავს ლგბტ პროპაგანდა.

პოპულარიზაციას.

  • რა ფორმით?

ნებისმიერი – ბეჭდური იქნება, ვიდეო ფორმით თუ სხვა. არსებობს ჯგუფები მსოფლიოში, რომელთა ინტერესი არის პოპულარიზაცია, არ ვიცი მოტივი და მიზანი რა არის, თუმცა უმრავლესობის ლიდერმა მამუკა მდინარაძე როცა ინიციატივის გაჟღერებაზე საუბრობდა, კონკრეტული მაგალითიც ახსენა, ეს ეხებოდა მულტიპლიკაციურ ფილმს, რომლის ფინალი სრულდებოდა ამით.

  • ფიქრობთ, რომ ხელოვნებაშიც ჩაერევით და განსაზღვრავთ რა შინაარსი, როგორი დასაწყისი ან დასასრული უნდა ჰქონდეს ფილმს?

არა. ამაზე არ არის საუბარი. რეკლამირებაზეა საუბარი და პროპაგანდაზე.

  • მაგალითად „ბათუმელები“ ხშირად ვაშუქებთ ხოლმე ლგბტ ადამიანების ისტორიებს, ისინი ჩვენთან საუბარში ჰყვებიან იმ გამოწვევების შესახებ, რომელიც მათი იდენტობის გამო ექმნებათ. საუბრობენ ჩაგვრაზე, დისკრიმინაციაზე. თქვენ ფიქრობთ, რომ ამ შინაარსის ვიდეო ან ტექსტური მასალა პროპაგანდაა?

არა, მაგას არ ვფიქრობ. არამედ იმას, როცა ვამბობთ, რომ ეს (ლგბტქ) არის კარგი და ეს არის ტრენდული. ასეთი რამ სოცქსელებშიც არსებობს – გატრენდების თემა, ამაზეა საუბარი.

თორემ, ადამიანი როცა არის „ასეთი“, დამთავრდა. მას აქვს ისეთივე უფლება, როგორც სხვა დანარჩენს.

ტრენდირებაა პროპაგანდა, რომ აქ უფრო ბედნიერად გრძნობს ადამიანი თავს და ასე შემდეგ.

  • თქვენ როგორ განსაზღვრავთ ამ კანონპროექტით, რა არის ადამიანის მოსაზრება, მისი პირადი აზრი და რა პროპაგანდა?

ამას მე ვერ განვსაზღვრავ, კანონმა უნდა განსაზღვროს.

ადამიანის ჩაგვრა, ბულინგი არის დანაშაული და ვერცერთ შემთხვევაში ამასთან კვეთა ვერ ექნება ამ ინიციატივას, თუკი იქნა მიღებული. თანასწორობის პრინციპი არ უნდა დაირღვეს.

  • ვთქვათ ქვიარ ადამიანი საუბრობს საჯაროდ თავის იდენტობაზე, იმაზე, რომ მოსწონს მისი ცხოვრების წესი, თქვენი პარტიის მიერ დაანონსებული კანონპროექტით ასეთი ადამიანები დაისჯებიან? 

არა. მაგრამ, თუ აქ არის საუბარი, განსაკუთრებით არასრულწლოვნების ნაწილში ტრენდირება, ე.წ მოდურობა…

  • საქართველოში ეს პრობლემა დგას?

მე იდენტიფიცირების გარეშე შემიძლია გითხრათ, რომ ყოფილა პრაქტიკაში შემთხვევა, ე.წ საუბრები, რომ გარკვეული ხედვა შეეცვალათ არასრულწლოვანისთვის. ეს არის დანაშაული, როცა ერთი ადამიანი სხვა ადამიანზე ზემოქმედებს, რომ ის გარდაქმნას. ჩვენს რეგიონში იყო მსგავსი შემთხვევა.

  • და ეს ჩაეთვლება ადამიანს ლგბტ პროპაგანდაში?

არა, ვერ გამიგეთ. აქ საუბარია, როცა მასობრივ გავრცელებაზე…

ინიციატორის სიტყვებიდან რაც ამოვიკითხე, აქ ისეთ კონტენტზეა საუბარი, რომელიც მასობრივად ვრცელდება სოცქსელებში, ეს იქნება ვიდეო, ბეჭდური თუ სხვა ტიპის თემა, რომელიც ტრენდულობას უწყობს ხელს.

გამოხატვის თავისუფლებას და კონსტიტუციის ჩარჩოებში გამოხატვას, თავისუფალი აზრის გავრცელებას კი, როგორ შეიძლება ამაზე კანონმა დააწესოს შეზღუდვა.

  • სოცქსელების კონტენტი როგორ უნდა გააკონტროლოთ?

სოცქსელში ბევრი რამ მომხდარა, რაზეც შეიძლება რეაგირება იყოს ხომ? როგორ ჩამოყალიბდება კანონი ჯერ არ ვიცით, ამიტომ არ არსებულ თემაზე ვსაუბრობთ.

  • თუ კანონპროექტი არ არის, არც არანაირი ხედვა არ გაქვთ და მით უმეტეს ამის საფუძველიც არ არსებობს, მაშინ რატომ დაიწყეთ ამაზე საუბარი?

არ ვიცი ეს მიიღებს თუ არა საბოლოოდ კანონის სახეს, ვერ გეტყვით. იმიტომ, რომ სამოქალაქო სექტორთან და პოლიტიკურ პარტიებთან უნდა მოხდეს მოსაზრებების გაცვლა. ეს ეტაპი არ დასრულებულა, ასე რომ ვთქვათ. ამიტომ ნორმებზე, მიზნებზე, ტერმინებზე და განმარტებებზე საუბარი ახლა ძალიან ძნელია.

  • თქვენ გეი მეგობრები გყავთ?

კი.

  • ისინი ეწევიან პროპაგანდას, იმ გაგებით, რასაც „ქართული ოცნება“ მოიაზრებს პროპაგანდაში?

შესაძლებელია, არ ვიცი. კანონი არ არის და მაგაზე რა ვილაპარაკო…

  • მსგავსი კანონი, რაზეც ახლა „ქართული ოცნება“ საუბრობს, პუტინმა მიიღო. სხვა არცერთ განვითარებულ ქვეყანაში არ არსებობს მსგავსი რამ. რა შესძინა ამ კანონმა რუსებს, რისგან დაიცვა ისინი?

რუსეთში არ არსებობს ადამიანის უფლებების დაცვის არანაირი სტანდარტი, ამიტომ პუტინთან პარალელს ვერ მივიღებ. იმიტომ, რომ რუსეთში არის ტოტალიტარული რეჟიმი და საქართველოს ხელისუფლებამ ხმა მისცა ჰააგაში რუსეთის პრეზიდენტის დაკავებას.

  • თუმცა ამის პარალელურად, თქვენი პარტიის ხელმძღვანელი ღარიბაშვილი, ბათუმში ყოფნისას ამბობდა, რომ სწორედ ჩვენს მეგობარ ქვეყნებში, ეწევიან „ანტიადამიანურ პროპაგანდას“ – ბაღებში შეჰყავთ ტრანსგენდერი ადამიანები და აჩვენებენ ბავშვებს, რომ ეს კარგია. თუმცა, ანტიდასავლური რიტორიკის ფონზე, ღარიბაშვილმა თავისი შვილი სწორედ იმ ქვეყანაში გააგზავნა საცხოვრებლად და სასწავლებლად, ვისაც ლგბტ პროპაგანდაში ადანაშაულებს, ამაზე რას ფიქრობთ?

არ მივიღებ ამ კითხვას სერიოზულად. ამერიკა რომ ჩვენი სტრატეგიული პარტნიორია, ამაზე ორივე მხარე ვსაუბრობთ. ევროპის კანდიდატის წევრი ვართ და საერთოდ არ დგას დღის წესრიგში ეს თემა.

აქ ტრენდირებაზეა საუბარი. ღარიბაშვილის განცხადებებმა ჩვენსა და ამერიკას ან ევროპას შორის ურთიერთობებზე გავლენა მოახდინა?

კანონპროექტი როცა შედგება, სამოქალაქო საზოგადოება შეხედავს, ჩვენი პარტნიორებიც შეხედავენ სავარაუდოდ და ვნახავთ ყველას რეაქციას და შეფასებებს. მერე შეგვიძლია ამაზე საუბარი. ახლა არ არარსებულ ნორმებზე ვსაუბრობთ.

  • მაშინ რატომ გინდათ ამ თემაზე დისკუსიის წამოწევა, საზოგადოების დროის დაკარგვა, თუ არ არსებული საკითხია?

საზოგადოება უნდა იყოს ჩართული…

თქვენ ხომ ახლა პოპულარიზაციას უკეთებთ ამ საკითხს, როცა საუბრობთ.

  • ჩვენ თქვენს სახეს ვაჩვენებთ საზოგადოებას.

ინიციატივები არის ყველა ქვეყანაში. კანონის დონეზე არ არის ეს, ჯერჯერობით ინიციატივაზეა საუბარი. თუმცა, მიდგომა უნდა იყოს კონსტიტუციური. ეს ნიშნავს ადამიანის უფლებების დაცვას.

  • ერთი კვირის წინ, ბათუმში ადამიანმა თვითმკვლელობა სცადა იმის გამო, რომ საკვები არ ჰქონდა სახლში. როგორ ფიქრობთ, ადამიანებისთვის რომელი საკითხია აქტუალური, სიღარიბის დაძლევა, შვილის ჯანმრთელობა თუ ის, რომ მთავრობამ არარსებულ ლგბტ პროპაგანდაზე იმსჯელოს მთელი წელი?

კონკრეტული ადამიანებისთვის რა თქმა უნდა მნიშვნელოვანია მათი სოციალური მდგომარეობის შეცვლა. ამიტომ აქვს სახელმწიფოს სოცდაუცველების პროგრამები. შეიძლება იდეალური პროგრამა არ იყოს, მაგრამ ვცდილობთ მოვიცვათ ადამიანები.

  • სიღარიბის სტატისტიკას იცნობთ არა? როგორ ფიქრობთ, რატომ იზრდება ყოველწლიურად სახელმწიფო შემწეობის მიმღებთა, მსურველთა რიცხვი, ამაზე რატომ არ მსჯელობს ღიად „ქართული ოცნება“, ეს საკითხი რატომ არ დგას დღის წესრიგში?

სიღარიბე არ იზრდება, სერვისების მიმღებთა ჯგუფი იზრდება.

ავიღოთ უშვილობის პროგრამა, ამ პროგრამაში ჩართულია 300 ათასი ქულის მქონე ადამიანებიც. ანუ, შესაძლოა დასაქმებულ ადამიანსაც ჰქონდეს ეს ქულა. ამიტომ შესაძლებელია, ბაზაში მყოფთა რაოდენობა ამიტომ გაიზარდა და ეს არ გულისხმობს, რომ ადამიანების მდგომარეობა გაუარესდა.

გადაბეჭდვის წესი


ასევე: