მთავარი,სიახლეები

65 000 ლარით დააჯარიმეს კამერუნის დროშის ქვეშ მცურავი გემი, რომელმაც ფოთში ზღვა დააბინძურა

28.02.2024 • 2672
65 000 ლარით დააჯარიმეს კამერუნის დროშის ქვეშ მცურავი გემი, რომელმაც ფოთში ზღვა დააბინძურა

კამერუნის დროშის ქვეშ მცურავმა გემმა შავი ზღვა სამეურნეო წყლებით დააბინძურა. სამართალდარღვევის შედეგად გარემოსთვის მიყენებული ზიანის ოდენობამ 2000-მდე ლარი შეადგინა.

გარემოსდაცვითი ზედამხედველობის დეპარტამენტისა და სასაზღვრო პოლიციის თანამშრომლების მიერ შედგენილი ადმინისტრაციული სამართალდარღვევის ოქმის (მუხლი 58 პრიმა 2, მე-7 ნაწილი) საფუძველზე, ფოთის სასამართლომ გემი სამართალდამრღვევად ცნო და 65 ათასი ლარის ოდენობის ჯარიმა დააკისრა.

კამერუნის დროშის ქვეშ მცურავ გემს საქართველოს ტერიტორიული წყლების დატოვებისა და თავისუფალი ნაოსნობის უფლება დაკისრებული საჯარიმო სანქციისა და გარემოსთვის მიყენებული ზიანის თანხის გადახდის შემდეგ მიეცა.

წელს უცხო ქვეყნის დროშის ქვეშ მცურავი გემების მიერ ზღვის დაბინძურების უკვე 2 ფაქტი გამოვლინდა.

მოქმედი კანონმდებლობით, აღნიშნულ სამართალდარღვევაზე ჯარიმა 65 000 ლარია. საქართველოს პარლამენტი განიხილავს საკანონმდებლო ცვლილებათა პაკეტს, რომელიც გემების მიერ ზღვის დაბინძურებაზე ჯარიმის 100 000 ლარამდე გაზრდას ითვალისწინებს.

გადაბეჭდვის წესი


ასევე: