მთავარი,სიახლეები

მახინჯაურში 22-სართულიან სამ კორპუსს ააშენებენ

22.02.2024 • 4430
მახინჯაურში 22-სართულიან სამ კორპუსს ააშენებენ

შპს „სითი ქონსთრაქშენი 2022“ მახინჯაურში მრავალფუნქციური კომპლექსის მშენებლობას გეგმავს.  კომპანიამ კ2 კოეფიციენტის გაზრდა მოითხოვა, ამიტომაც მას კვარტალის განაშენიანების დეტალური გეგმის [გდგ] მომზადება მოსთხოვეს.

როგორც დოკუმენტშია მითითებული, დასაგეგმარებელი ტერიტორია 43 საკადასტრო ერთეულს და ერთ დაურეგისტრირებელ ნაკვეთს მოიცავს, რომელთა საერთო ფართობი 39 560 კვ.მეტრია. მშენებლობა დაგეგმილია 15 970 კვ.მეტრზე. კომპანია სამი 22-სართულიანი და ხუთი 3-6- სართულიანი შენობების მშენებლობას გეგმავს. 

დაგეგმვის პირველ ეტაპზე კომპანიამ მერიას გდგ-ის კონცეფცია წარუდგინა. ახლა უკვე მზად არის განაშენიანების დეტალური გეგმაც.

ფოტოზე გეგმარებითი ერთეული შემოხაზულია მწვანე ფერით. როგორც რუკაზე ჩანს, ის მოიცავს ქალაქის ცენტრალური ნაწილის სამხრეთით დასახლებას მახინჯაურში, ჩრდილოეთით და აღმოსავლეთით ესაზღვრება ამაღლების ქუჩა და ამ ქუჩის პირველი შესახვევი, ხოლო სამხრეთით და დასავლეთით – ახალგაზრდობის ქუჩა, ასევე, განაშენიანებული და თავისუფალი მიწის ნაკვეთი.

გეგმარებით ერთეულში შემავალ მიწის ნაკვეთებზე ძირითადად განთავსებულია ინდივიდუალური საცხოვრებელი სახლები. გდგ-ში ასევე ვკითხულობთ, რომ გეგმარებით ერთეულის მიმდებარე ტერიტორიებზე განთავსებულია მრავალსართულიანი საცხოვრებელი კორპუსები და სასტუმროები. ნაწილი განახლებულია, ხოლო ნაწილზე მიმდინარეობს ახალი მშენებლობები.

განაშენიანების დეტალურ გეგმაში პროექტის განხორციელების საჭიროებას განახლების აუცილებლობით ხსნიან:

„მრავალფუნქციური კომპლექსის მშენებლობა ხელს შეუწყობს ტერიტორია გახადოს უფრო თანამედროვე, პრესტიჟული, მოთხოვნადი უძრავი ქონების ბაზარზე, გაზარდოს საბინაო ფონდი, შეიქმნას უკეთესი საინვესტიციო გარემო და გაჩნდეს მეტი სამუშაო ადგილი. შესაბამისად, გაუმჯობესდეს ადგილობრივი მოსახლეობის სოციალური მდგომარეობა.“

განაშენიანების დეტალური გეგმა კვარტალში მცხოვრები მოსახლეობის გამოკითხვასაც გულისხმობს.

დოკუმენტში წერენ, რომ გამოკითხულები ბოლო წლების განმავლობაში განხორციელებულ ინვესტიციებს დადებითად აფასებენ, რადგან საცხოვრებელი უბანი ბევრად პრესტიჟული გახდა.

მშენებლობის მოწინააღმდეგე რესპონდენტებზეც მიუთითებენ, რომ მათი პასუხები ზოგადია:

„მრავალფუნქციური კომპლექსის აშენების მოწინააღმდეგე რესპონდენტის ძირითადი განწყობა პასუხებიდან გამომდინარე უფრო ზოგადი ხასიათის იყო და ძირითადად აფიქსირებდნენ პოზიციას, რომ აღნიშნულ უბანში ადრე საერთოდ არ იყო მაღლივი კორპუსები და სასტუმროები აშენებული და იმ პერიოდში ცხოვრება ბევრად მშვიდი, კომფორტული იყო. ბოლო დროს კი უბანსა და მის მიმდებარე ტერიტორიაზე განხორციელდა ბევრი სამშენებლო ინვესტიცია, რამაც გაზარდა საკვლევ არეალში დასახლების მაჩვენებელი, რის შედეგადაც მეტ-ნაკლებად მოხდა უბნის გადატვირთვა და ამით შესაძლოა სამომავლოდ გაუარესდეს საცხოვრებელი პირობები.“

საბოლოოდ კომპანია ასკვნის:

„თუმცა უარყოფითად განწყობილი რესპონდენტების ნაწილი იქვე აღნიშნავს, რომ მშენებლობა განვითარების აუცილებელი წინაპირობაა და საინვესტიციო ინტერესი შეუქცევადი პროცესია და საბოლოოდ ინვესტიციის განხორციელებით შესაძლოა უფრო მეტი სიკეთის მიღება, ვიდრე – პირიქით. უნდა აღინიშნოს, რომ რესპონდენტები, რომლებიც უარყოფითად აფასებენ მომავალ მშენებლობას, საერთო გამოკითხულთა 9.75%-ია. კვლევამ ცხადყო, რომ მრავალბინიანი სახლის აშენების შემდგომ უბნის განვითარების დადებითი დინამიკა გარდაუვალია.“

დოკუმენტის მიხედვით, მიწის ნაკვეთების საერთო ფართობი – 39 560 კვ.მეტრია, აქედან კომპანიის ფართობი 15 970 კვ. მეტრია.

კომპლექსს დახურულ მიწისქვეშა სართულებზე პარკინგისთვის 650 ავტომობილის ადგილი ექნება, ხოლო მიწისზედა პარკინგზე – 520 ავტომანქანის ადგილი.

გდგ-ში ასევე წერენ, რომ ავტოსადგომების რაოდენობა განისაზღვრება „ტერიტორიების გამოყენების და განაშენიანების რეგულირების ძირითადი დებულებების“ მიხედვით და დაზუსტდება ობიექტის საპროექტო დოკუმენტაციის დამუშავების შედეგად.

დოკუმენტების მიხედვით, კომპლექსის პარამეტრები ასეთია:

  •  საცხოვრებელი ფართობები: [ცალ-ცალკე: ბინა, სასტუმროს ტიპის ბინა, სასტუმროს ნომერი] – 3 000 აპარტამენტი – 100 000 კვ.მეტრი
  • საზოგადოებრივი ფართობი – 25 000 კვ.მ.
  • სამშენებლო ფართობი – 170 000 კვ.მ
  •  მოცულობები – 1000000 კუბ/მ.
  • სართულიანობა: განაშენიანების მაქსიმალური სიმაღლე (მ) – 115 და 15 მ.

შპს „სითი ქონსთრაქშენი 2022“-ის 50 პროცენტს შპს „City star“-ი ფლობს. ამ კომპანიის ასი პროცენტის მფლობელი ამირან კაკაბაძეა. 50 პროცენტს კი „მარდი ჰოლდინგი ფლობს“ – ეს კომპანია ირაკლი თურმანიძეს ეკუთვნის.

გადაბეჭდვის წესი


ასევე: