არასამთავრობო ორგანიზაცია, „სამოქალაქო ინტეგრაციისა და ეროვნებათაშორისი ურთიერთობის ცენტრის“ მიერ მომზადებული კვლევის მიხედვით, საქართველოში არსებული საჯარო სკოლების უმრავლესობას სჭირდება მშენებლობა, რეაბილიტაცია ან რემონტი.
1561 სკოლიდან მიღებული ინფორმაციის მიხედვით, სკოლების 59 პროცენტს სჭირდება სრული ან ნაწილობრივი რეაბილიტაცია ან ახლის აშენება. მხოლოდ 28 პროცენტია ახლად აშენებული, გარემონტებული და რეაბილიტირებული.
9 პროცენტში დაგეგმილია რემონტი, რეაბილიტაცია ან მშენებლობა. ხოლო 4 პროცენტში მიმდინარეობს რეაბილიტაცია, რემონტი ან მშენებლობა.
რეაბილიტირებული სკოლების 51 პროცენტი მოდის თბილისზე. ძალიან დაბალი – 11-12%, სამეგრელო-ზემო სვანეთზე, გურიასა და რაჭა-ლეჩხუმზე.
საბუნებისმეტყველო ლაბორატორიები
ფოტო კვლევიდან.
ამავე კვლევის მიხედვით, საჯარო სკოლების მხოლოდ 31 პროცენტს აქვს საბუნებისმეტყველო ლაბორატორია, 64%-ს კი არ გააჩნია არანაირი საბუნებისმეტყველო ლაბორატორია.
ფოტო კვლევიდან
დარჩენილ ნაწილს აქვს ან ვირტუალური, ან მოძველებული ლაბორატორია, რომელსაც ვერ იყენებენ. ამ სკოლების ხვედრითი წილი მოდის სწორედ რეგიონებზე. რაჭა-ლეჩხუმის, ქვემო სვანეთის, გურიის, მცხეთა-მთიანეთის სკოლებზე.
დიდი ქალაქების – ბათუმი, ქუთაისი, რუსთავი – სკოლების შემთხვევაში სკოლების 50%-ს აქვს ლაბორატორია.
კვლევის მიხედვით, გამოირჩევა ბათუმი, სადაც 27 სკოლიდან 26 სკოლას აქვს ლაბორატორია.
რუსთავში კი 26 სკოლიდან მხოლოდ 8 სკოლას აქვს საბუნებისმეტყველო ლაბორატორია.
კომპიუტერები და პრინტერი
ფოტო კვლევიდან
კვლევის მიხედვით, სკოლებიდან მიღებული ინფორმაციის მიხედვით, 87%-ს აქვს სკოლაში კომპიუტერები და პრინტერები.
„სკოლების 90%-ი აღნიშნავს, რომ აქვთ ინტერნეტი, თუმცა პირად კომუნიკაციებში აღნიშნავენ, რომ არსებული ინტერნეტი დაბალი ხარისხისაა და რთულად გამოიყენება სასწავლო პროცესში. ფაქტობრივად, ფორმალურად არის სკოლების ნაწილში“, – წერია კვლევაში.
ტექნიკის ხელმისაწვდომის პრობლემა იკვეთება ლანჩხუთის, ჩხოროწყუს, დმანისის, სიღნაღის, ჭიათურის, ხელვაჩაურის მუნიციპალიტეტების ზოგიერთ სკოლაში.
კვლევაში გამოყენებული მონაცემები შეგროვებულია საჯარო ინფორმაციაზე დაყრდნობით.
თუმცა, როგორც კვლევის ავტორი ორგანიზაცია აღნიშნავს, ინფორმაცია არ მიაწოდეს გორის, მარნეულის, ზესტაფონის, ბოლნისის, სამტრედიის, კასპის, ქარელის, ახალციხის, ახმეტის, ყვარლის, წალენჯიხის, ხულოს, დედოფლისწყაროს, თეთრიწყაროს მუნიციპალიტეტებმა. ასევე, თბილისის მერიამ და მის ტერიტორიაზე განლაგებულმა ვაკე-საბურთალოსა და ისანი-სამგორის რესურსცენტრებმა.
საქართველოში ამჟამად 2086 საჯარო სკოლაა, აღნიშნული მონაცემები კი 1561 სკოლიდან მიღებულ ინფორმაციას ეყრდნობა.
კვლევა გამოქვეყნდა 2024 წლის იანვარში.
