ხმელთაშუა ზღვაში ქართველმა მეზღვაურებმა 34 მიგრანტი გადაარჩინეს. შემთხვევა სამი დღის წინ მოხდა. მეზღვაურებთან დაკავშირება „ბათუმელებმა“ დღეს, 23 იანვარს, მოახერხა.
„20 იანვარს, დაახლოებით საღამოს 7 საათისთვის თავისი მორიგეობის დროს, უფროს თანაშემწეს, როდამ ფუტკარაძეს, დაუკავშირდა კუნძულ კრეტას სამაშველო სამსახური და მიაწოდა ინფორმაცია ჩვენი გემის, პანამის დროშის ქვეშ მცურავი გემი Lider Halil-ის ახლოს იმყოფებოდა მიგრანტების ნავი, რომელზეც დაახლოებით 25 ადამიანი იყო და ითხოვდა შველას.
მე ვარ ამ გემის კაპიტანი. უფროსი თანაშემწე დამიკავშირდა და მომახსენა არსებული სიტუაცია. ამის შემდეგ გამოვაცხადე სრული მობილიზაცია, ჩვენი გემი ჩაერთო სამძებრო-სამაშველო სამუშაოებში. ეს ხდებოდა დაახლოებით საღამოს 8 საათისათვის. სამაშველო სამუშაოები 23 საათამდე გაგრძელდა. შედეგად ზღვიდან უსაფრთხოდ ამოვიყვანეთ და გადავარჩინეთ 34 მიგრანტი,“ – უყვება „ბათუმელებს“ გემ Lider Halil-ის კაპიტანი ვაჟა ჯანგველაძე.
კაპიტან ვაჟა ჯანგველაძის თქმით, მიგრანტებმა ზღვაში სამი დღე და ღამე გაატარეს. იყვნენ პანიკაში, შეშინებულები.
„ნავზე იყვნენ მხოლოდ კაცები – პაკისტანიდან, სირიიდან და ეგვიპტიდან. როგორც მიგრანტები მოგვიყვნენ, დამსაქმებელმა ისინი მოტყუებით ჩაიყვანა ლიბიაში, დასაქმების დაპირებით და ლიბიიდან ევროპის ქვეყნებში გადაყვანის პირობით. თუმცა მოატყუა. მიგრანტები ერთი წლის განმავლობაში ლიბიაში გაუსაძლის მდგომარეობაში ცხოვრობდნენ.
შემდეგ რაღაცნაირად შეძლეს რეზინის ნავის შოვნა და ამით დატოვეს ლიბია. სამი დღე-ღამე იმყოფებოდნენ ზღვაში“, – უთხრა „ბათუმელებს“ ვაჟა ჯანგველაძემ.
გემის კაპიტანმა და ეკიპაჟის წევრებმა მიგრანტებს პირველადი დახმარება აღმოუჩინეს. მეორე დღეს, 21 იანვარს კი გემის კაპიტანმა ყველა მიგრანტი კუნძულ კრეტის სამაშველო სამსახურს გადასცა.
პანამის დროშის ქვეშ მცურავი გემის Lider Halil-ის ეკიპაჟის 14 წევრიდან სამი ქართველი მეზღვაურია: კაპიტანი ვაჟა ჯანგველაძე, უფროსი თანაშემწე როდამ ფუტკარაძე და მეორე მექანიკოსი ჯივან გურგენიძე.
