მთავარი,სიახლეები

უკრაინაში ბოლო 24 საათში ფრონტზე 73 შეტაკება მოხდა – უკრაინის გენშტაბის ბოლო ცნობები

05.12.2023 • 563
უკრაინაში ბოლო 24 საათში ფრონტზე 73 შეტაკება მოხდა – უკრაინის გენშტაბის ბოლო ცნობები

უკრაინის გენერალური შტაბი დღეს, 5 დეკემბერს იუწყება, რომ უკრაინელმა ჯარისკაცებმა მოიგერიეს რუსეთის თავდასხმები ავდიივკას, კლიშჩეევკასა და მარინკას მახლობლად.

გენშტაბის ბოლო ცნობების თანახმად, რუსეთის არმია აგრძელებს აქტიურ ზეწოლას ავდიივკას მახლობლად, ასევე, დონეცკის ოლქის ბოგდანოვკას, კლეშჩეევკასა და ანდრეევკას რაიონებში და შეტევას კუპიანსკისა და ლიმანის მიმართულებით.

უკრაინის გენშტაბის ცნობით, გასულ 24 საათის განმავლობაში უკრაინის თავდაცვის ძალებმა მოიგერიეს მტრის 70-ზე მეტი შეტევა.

გენშტაბი იუწყება, რომ ავდიივკა კვლავ ფრონტის ერთ-ერთ ყველაზე ცხელ წერტილად რჩება და უკრაინელები აგრძელებენ მტრის შეკავებას, რომელიც არ ტოვებს ავდიივკას ალყაში მოქცევის მცდელობას.

ასევე, მარინკის მიმართულებით უკრაინის თავდაცვის ძალები აგრძელებენ მტრის შეკავებას – გენშტაბის ცნობით, მათ მოიგერიეს რუსეთის შეიარაღებული ძალების 18 თავდასხმა დღეში.

ზაპოროჟიეს მიმართულებით უკრაინის თავდაცვის ძალებმა მოიგერიეს მტრის ყველა შეტევა. უკრაინული მხარის ცნობით, რუსეთი აქ ცდილობდა დაკარგული პოზიციის აღდგენას რობოტინოს სამხრეთით მდებარე რაიონებში.

რაც შეეხება ხერსონის მიმართულებას, აქ თავდაცვის ძალები აგრძელებენ პოზიციების დაკავებას დნეპრის მარცხენა სანაპიროზე და მტერს ზურგში აყენებენ დარტყმებს.

გენერალური შტაბის ცნობით, უკრაინაში ბოლო 24 საათის განმავლობაში მოხდა 73 შეტაკება, რუსეთმა განახორციელა 8 სარაკეტო და 68 საჰაერო დარტყმა და 87 შეტევა მრავალჯერადი სარაკეტო სისტემებიდან.

________________

ფოტო: უკრაინის გენერალური შტაბი/facebook 

გადაბეჭდვის წესი


ასევე: