ბათუმის 2023 წლის ბიუჯეტში 6,4 მილიონი ლარი გაითვალისწინეს იმ კერძო საკუთრების გამოსასყიდად, რომელიც ფარნავაზ მეფისა და ინასარიძის ქუჩების გაგრძელებისთვის, ასევე ადლიისა და კაჩინსკების ქუჩების დასაკავშირებლადაა საჭირო.
კერძო მესაკუთრეები მერიასთან თუ ვერ შეთანხმდებიან, მათ საკუთრებას ექსპროპრიაციის წესით ჩამოართმევენ.
აღნიშნული სამუშაოები ბათუმის მერიას აქვს დაგეგმილი, რაზედაც ქალაქის საკრებულოც თანახმაა.
კერძო საკუთრების გამოსყიდვის შემდეგ, მერიის ინფრასტრუქტურისა და კეთილმოწყობის სამმართველო მოამზადებს შესაბამის პროექტსა და ხარჯთაღრიცხვას, აუცილებელი იქნება ასევე კვლევები და ექსპერტიზა, რის შემდეგადაც დაიწყება უშუალოდ სამშენებლო [ქუჩების გაგრძელება-შეერთების] სამუშაოები, მანამდე კი ხარჯთაღრიცხვის შესაბამისი თანხის ქალაქის ბიუჯეტში გათვალისწინება და ტენდერის გამოცხადება იქნება საჭირო.
დაიწყო თუ არა კერძო მესაკუთრეებთან მოლაპარაკება ქონების გამოსყიდვაზე და რა ეტაპზეა? – ამ კითხვაზე მერიის პასუხს მიღების შემთხვევაში აქვე მოგაწვდით.
რაც შეეხება ბათუმის 2024 წლის ბიუჯეტის პროექტს, სამშენებლო სამუშაოებისთვის თანხა ჯერ გაწერილი არ არის.
დაგეგმილი სამუშაოები
- ბათუმის მერია გეგმავს ადლიის ქუჩა დაუკავშიროს ლეხ და მარია კაჩინსკების ქუჩას. მერიის ინფორმაციით, ამ ქუჩებს შორის შემაერთებელი გზის მშენებლობის პროექტისთვის შპს „ელთ ბილდინგის“ საკუთრებაში არსებული ორი ნაკვეთიდან 1105 კვადრატული მეტრი ფართობია საჭირო.
- ინასარიძის ქუჩის ლეხ და მარია კაჩინსკების ქუჩამდე გაგრძელების [შეერთების] პროექტი კი, მერიის ინფორმაციით, მოიცავს კერძო საკუთრებაში რეგისტრირებული 10 უძრავი ქონების [მიწის ნაკვეთების – სულ 16 809 კვ.მ] ნაწილებს, მათგან 5-ზე განთავსებულია შენობები.
მერიას ინასარიძის ქუჩის გასაგრძელებლად ჯამში 7112 კვადრატული მეტრი ფართობის 10 მიწის ნაკვეთის და ორი მესაკუთრის 220,6 კვადრატული მეტრი ფართობის შენობის ათვისება მოუწევს.
- ფარნავაზ მეფის ფიროსმანის ქუჩამდე გაგრძელების პროექტი „მოიცავს კერძო საკუთრებაში რეგისტრირებულ 9 უძრავ ქონებას და სახელმწიფო საკუთრებაში არსებულ 2 უძრავ ქონებას, მათგან 6-ზე განთავსებულია შენობები.“
მერიის დოკუმენტების მიხედვით, პროექტის განხორციელებისთვის ასათვისებელია მიწის ნაკვეთების 3 502 კვადრატული მეტრი ფართობი და მესაკუთრეების შენობა-ნაგებობები.
ამ თემაზე ვრცლად:
ფარნავაზ მეფის ქუჩა ფიროსმანამდე გაგრძელდება – ექსპროპრიაციით ან შეთანხმებით მესაკუთრეებთან
