მთავარი,სიახლეები

როგორ ცხოვრობს 5 ბავშვი უფანჯრო სახლში

25.10.2023 • 9469
როგორ ცხოვრობს 5 ბავშვი უფანჯრო სახლში

„ეს ჩვენი ფანჯარაა“ – ასე აღწერა მარიმ ვიდეო, რომელშიც ბეტონის კედელი და ფანჯრის ადგილას გამოკრული ქსოვილი ჩანს. ქსოვილის ზედა ნაწილიდან ბნელი ღამე მოჩანს. მარის თქმით, უფანჯრო სახლში ადვილად აღწევს სიცივე, ქარი და წვიმა.

მარი მოსიაშვილი მარტოხელა დედაა და ამჟამად მშობლებთან და თავის ხუთ და-ძმასთან ერთად ცხოვრობს თელავში, სოფელ ფშაველში.

„მე ერთი წლის შვილი მყავს და მარტო ვზრდი. მამა ალიმენტს არ იხდის. 25 წლის ვარ, მაგრამ არსად ვმუშაობ. ახლა პატარა ბავშვი მყავს და მასზე ზრუნვის გარდა ჩემს პატარა და-ძმებზეც მიწევს ზრუნვა.

ჩემი 16 წლის ძმა შშმ პირია, ვერ გადაადგილდება, ამიტომ მასაც მუდმივი ზრუნვა სჭირდება. ავადაა ორი წლის დაც, რომელსაც გულის სარქვლის ოპერაცია გავუკეთეთ, მაგრამ მაინც მძიმედ სუნთქავს და ხშირად სჭირდება ექიმთან ვიზიტი და კონტროლი“, – მოუყვა „ბათუმელებს“ მარი მოსიაშვილი საკუთარ ოჯახზე.

ვალერი და ხათუნა მოსიაშვილების 9-წევრიანი ოჯახი თელავში, სოფელ ფშაველში ცხოვრობს. ოჯახში სულ ცხრა ადამიანია, მათგან ხუთი არასრულწლოვანია, ერთი ბავშვი კი პირველი ჯგუფის შშმ პირია.

მარი მოსიაშვილის დედა და და-ძმა

ოჯახის არც ერთი წევრი არ მუშაობს. სიღარიბეში მცხოვრები ოჯახი დახმარებას საზოგადოებას სთხოვს.

„ბათუმელებთან“ მარი მოსიაშვილი ამბობს, რომ ბავშვები სოციალურ შემწეობას იღებენ, რაც მთლიანობაში ათასი ლარია, თუმცა არსებულ პრობლემებსა და ოჯახის საჭიროებებს მაინც არ ჰყოფნის.

„ჩემს პატარა დას მეტყველების პრობლემაც აქვს. როგორც გვეუბნებიან, ოპერაციაა საჭირო. მამაჩემმა ერთი წლის წინ ფეხი მოიტეხა, ოპერაცია გაუკეთეს, მაგრამ მას შემდეგ ფეხზე ვეღარ დადის. კოჭთან დაჩირქებული აქვს, დედა უსვამს მალამოებს, მაგრამ მაინც არ შველის. ოპერაციის შემდეგ ექიმს არც კი მოუკითხია“, – გვეუბნება მარი მოსიაშვილი.

მოსიაშვილების სახლში კედლები დახსნილია, არ აქვს ფანჯრები და ადვილად აღწევს წვიმა და ქარი.

მარი მოსიაშვილის მონათხრობის მიხედვით, „კედლები შეულესავია და უფანჯრო. ამიტომ ღია სივრცეებში ზეწრები გვაქვს აფარებული, საიდანაც მაინც შემოდის სიცივე, წვიმა და ქარი.

კედლებს შორის ძალიან დიდი ბზარებია, ერთადერთი ოთახი გვაქვს მხოლოდ შეთეთრებული, მაგრამ ისიც კეთილმოუწყობელია.“

მოსიაშვილები მუნიციპალური სასადილოთი არ სარგებლობენ, რადგან, როგორც მარი მოსიაშვილი ამბობს, თელავის მუნიციპალიტეტს ასეთი სასადილო არ აქვს.

„ერთი პატარა ბაღჩა გვაქვს მხოლოდ და ამას ვამუშავებთ, სხვა არაფერი გაგვაჩნია“, – გვეუბნება ის.

„ბათუმელები“ თელავის მერიასაც დაუკავშირდა და ჰკითხა, აქვს თუ არა მერიას სოციალურად დაუცველი ოჯახებისთვის რაიმე პროგრამა, რომლის ფარგლებშიც მათ ფინანსურად დაეხმარება, თუნდაც სახლის რეაბილიტაციის მიზნით.

მერიაში ამ კითხვაზე არ გვიპასუხეს.

მოსიაშვილებს საზოგადოების დახმარების იმედი აქვთ.

________________________

იმ შემთხვევაში, თუკი გადაწყვეტთ, რომ ფინანსურად დაეხმაროთ მოსიაშვილების ცხრასულიან ოჯახს, თანხა შეგიძლიათ გადარიცხოთ შემდეგ ანგარიშებზე:

თიბისი ბანკი – GE22TB7154645068100037

მიმღები: ხათუნა მოსიაშვილი

საქართველოს ბანკი – GE42BG0000000345897398

მიმღები: მარი მოსიაშვილი

გადაბეჭდვის წესი


ასევე: