დღეს, 24 ოქტომბერს, ბათუმის საკრებულოს სხდომაზე ოპოზიციამ – „ლელომ“, „ერთიანმა ნაციონალურმა მოძრაობამ“ და „გახარია – საქართველოსთვის“ ერთმა წარმომადგენელმა სხდომა პროტესტის ნიშნად დატოვეს.
ოპოზიციის პროტესტი შეეხებოდა დღეს სხდომაზე გამოტანილ საკითხებს – კერძოდ, გადაწყვეტილებებს კონკრეტული პროექტების K2 კოეფიციენტების გაზრდასთან დაკავშირებით. სხდომაზე დაამტკიცეს ერთი დეტალური განაშენიანების გეგმა და სამი კონცეფცია.
ოპოზიციის პროტესტის საფუძველია ისიც, რომ ეს საკითხები საკრებულოს უმრავლესობამ სხდომამდე ორი დღით ადრე დამატებითი, საკითხების სახით მიაწოდა ოპოზიციას და დეპუტატებს მათი შესწავლის დრო ფაქტობრივად არ ჰქონდათ.
ოპოზიციამ დღეს ამ საკითხების დღის წესრიგიდან ამოღების საკითხი დააყენა, მაგრამ უმრავლესობამ ეს მოთხოვნა ჩააგდო.
ოპოზიციამ ათწუთიანი შესვენება მოითხოვა სათათბიროდ. ამ დროში „ლელო, ენმ და გახარიას პარტიის წარმომადგენლები შეთანხმდნენ დაეტოვებინათ საკრებულოს სხდომა და რადგან დღეს საკრებულოს უმრავლესობის ერთი წევრი სხდომას არ ესწრებოდა, „ოცნებას“ კვორუმი არ ექნებოდა, სხდომა ჩაიშლებოდა და საკითხებს ვერ დაამტკიცებდნენ.
თუმცა ოპოზიციის ეს გეგმა ნატალია ძიძიგურმა ჩაშალა, „გახარია – საქართველოსთვის“ წევრმა. მან თქვა, რომ სხდომაზე რჩება პირადი გადაწყვეტილებით და არ ათანხმებს პარტიას ინდივიდუალურ გადაწყვეტილებებს.
„მე დამოუკიდებელი ვარ და საკრებულოში კრიზისს არ დავუშვებ“ – აღნიშნა ნატალია ძიძიგურმა.
ოპოზიციამ აღნიშნა, რომ ნატალია ძიძიგურმა დღეს „ოცნებას“ „კომფორტი შეუქმნა“. მოგვიანებით მან მხარი დაუჭირა ყველა იმ საკითხს, რის გამოც ოპოზიციამ სხდომა დატოვა.
ოპზოციის ცარიელი სავარძლები საკრებულოს სხდომაზე
ამავე თემაზე:
https://batumelebi.netgazeti.ge/news/501063/
