Batumelebi | მოსახლეობა დაპირებულ კომპენსაციას ისევ მოითხოვს მოსახლეობა დაპირებულ კომპენსაციას ისევ მოითხოვს – Batumelebi
RU | GE  

მოსახლეობა დაპირებულ კომპენსაციას ისევ მოითხოვს

სამი სოფლის, კირნათის, მარადიდისა და მირვეთის მაცხოვრებელთა საპროტესტო აქცია, დღესაც მიმდინარეობს.  სოფლის მცხოვრებლები კომპანია „აჭარ ენერჯი 2007“-ისგან  მდინარე აჭარისწყალზე ჰესების მშენებლობის სანაცვლოდ ფულად კომპენსაციას მოითხოვენ. მოსახლეობა ამბობს, რომ კომპანიაც და ხელისუფლებაც კომპენსაციის გაცემას დიდი ხნის წინ დაჰპირდა, თუმცა პირობა არცერთმა არ შეასრულა.

აქციის მონაწილეები კომპანიის წარმომადგენლებს უფლებას არ აძლევენ ჰესის მშენებლობა გააგრძელონ. როგორც სოფელ კირნათის მაცხოვრებელი ზვიად ჯიხაძე „ბათუმელებთან“ საუბარში ამბობს, საპროტესტო აქციის მონაწილეებს ხელვაჩაურის გამგეობის წარმომადგენლები შეხვდნენ და მოითხოვეს, კომპანიის წარმომადგენლებისთვის ობიექტზე შესვლის უფლება მიეცათ.

„მოვიდნენ ხელისუფლების წარმომადგენლები გამგეობიდან და კომპანიის თანამშრომლების შეშვება მოითხოვეს, რადგან ობიექტზე საქმე ფუჭდებაო. ჩვენი მიზანიც ეგ არის, რომ მათ არ მივცეთ მუშაობის უფლება, რადგან კომპანია არ ასრულებს დანაპირებს. ჩვენი პროტესტი უნდა გახდეს მათთვის პრობლემა, ისე ჩვენი ყურადღების მომქცევი არ არიან“- გვეუბნება ის.

ზვიად ჯიხაძის თქმით, ადგილზე იმყოფება საპატრულო პოლიციაც. „ჯერ-ჯერობით ძალისმიერ მეთოდებს არ მიმართავენ, მაგრამ შემდგომში რა იქნება არ ვიცით. ამჯერად აქციაზე 50 ადამიანზე მეტნი ვართ, კიდევ იკრიბება ხალხი. მორიგეობა გვაქვს დაწესებული და ყოველდღიურად ვიკრიბებით“.

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com