2023 წლის სექტემბერში ბათუმში საცხოვრებელი ბინების ტრანზაქციების [ყიდვა-გაყიდვა] რაოდენობა გასული წლის სექტემბერთან შედარებით 31%-ით შემცირდა. შედარებისთვის, თუ გასული წლის სექტემბერში 1 685 ბინა გაიყიდა, წელს გაყიდული ბინების ოდენობა იმავე თვეში 1 163-ია.
„ასევე, 30%-ით შემცირდა ბაზრის ზომა და 53 მილიონი აშშ დოლარი შეადგინა,“ – ნათქვამია ბათუმის უძრავი ქონების ბაზრის კვლევაში, რომელსაც Recov.ge-ზე Colliers Georgia აქვეყნებს.
ამავე კვლევის მიხედვით, ბათუმში 2023 წლის სექტემბერში ახალაშენებული ბინების ტრანზაქციების [ყიდვა -გაყიდვა] რაოდენობა 32%-ით შემცირდა, ძველი ბინების შემთხვევაში კი, 20%-იანი კლება დაფიქსირდა.
Colliers Georgia-ს მონაცემებით, 2023 წლის სექტემბერში 7%-ით გაიზარდა ბათუმში ახალაშენებული ბინების საშუალო შეწონილი ფასი და კვ.მ-ზე 940 აშშ დოლარი შეადგინა. ძველი ბინების შემთხვევაში კი მაჩვენებელი 13%-ით, 751 აშშ დოლარამდე გაიზარდა.
Colliers Georgia ასევე აქვეყნებს კვარტალურ მონაცემებს.
ამ მონაცემების თანახმად, მიმდინარე წლის მესამე კვარტალში ბათუმში საცხოვრებელი ბინების ტრანზაქციების [ყიდვა-გაყიდვა] რაოდენობა გასული წლის III კვარტალთან შედარებით 18%-ით [3 871 ერთეულამდე], ბაზრის ზომა კი 19%-ით შემცირდა და 164 მილიონი აშშ დოლარი შეადგინა.
„ბათუმში 2023 წლის III კვარტალში ახალაშენებული ბინების ტრანზაქციების რაოდენობა 18%-ით შემცირდა, ძველი ბინების შემთხვევაში კი 23%-იანი კლება დაფიქსირდა.
ბათუმში 2023 წლის III კვარტალში ახალაშენებული ბინების საშუალო შეწონილი ფასი 15%-ით გაიზარდა და კვ.მ-ზე 969 აშშ დოლარი შეადგინა. ძველი ბინების შემთხვევაში კი მაჩვენებელი 7%-ით, 711 აშშ დოლარამდე გაიზარდა,“ – ნათქვამია Recov.ge-ზე Colliers Georgia-ს მიერ გამოქვეყნებულ კვლევაში.
ამავე თემაზე:
ბათუმში ბინების საშუალო ფასი $ 983-მდე გაიზარდა, გაყიდვები კი შემცირდა – კვლევა
