2024 წლის 1-ელი იანვრიდან, უმცროსი ექიმების, ექთნის თანაშემწეების, ბებიაქალებისა და სანიტრების შრომის ანაზღაურებაზე მინიმალური სახელფასო ზღვარი დაწესდება.
ინფორმაციას ამის შესახებ საქართველოს ჯანდაცვის სამინისტრო ავრცელებს. სამინისტროს ცნობით, სახელფასო ცვლილება სამედიცინო პერსონალზე ასე გადანაწილდება:
- უმცროსი ექიმი – თვეში, არანაკლებ 960 ლარი (საათში – 5 ლარი) დარიცხული
- ექთნის თანაშემწე – თვეში არანაკლებ 672 ლარი (საათში – 3,5 ლარი) დარიცხული
- ბებიაქალი – თვეში, არანაკლებ 844 ლარი (საათში – 4,4 ლარი) დარიცხული
- სანიტარი – თვეში არანაკლებ 576 ლარი (საათში – 3 ლარი ) დარიცხული
ახალი რეგულაციით, ხელფასის ზრდა 6000-მდე პირს შეეხება. შედეგად, მინიმალური ხელფასის დაწესების რეფორმა სტაციონარულ განყოფილებაში ჩართულ ყველა სამედიცინო პერსონალზე აისახება.
ჯანდაცვის სამინისტროს ცნობით, „2023 წელს განხორციელდა რეფორმის პირველი ეტაპი, რა დროსაც გაიზარდა მინიმალური ანაზღაურება ექიმებისა და ექთნებისთვის, რამაც ჯანდაცვის სფეროში მომუშავე დაახლოებით 15 000 გაუუმჯობესა სამუშაო პირობები“.
„რეფორმის შედეგად, საყოველთაო ჯანდაცვის პროგრამაში სტაციონარული კომპონენტით ჩართული ყველა კლინიკა ვალდებული იქნება, სამედიცინო პერსონალის სახელფასო ანაზღაურება, ჯანდაცვის სამინისტროს მიერ წარმოდგენილი, მინიმალური ზღვრის გათვალისწინებით დაადგინოს,“ – ნათქვამია ჯანდაცვის სამინისტროს მიერ გავრცელებულ რელიზში.
პროცესს მონიტორინგს შრომის ინსპექციის სამსახური გაუწევს.
