უკანონო კაფე ქობულეთის პლაჟზე მერიასთან ახლოს – როგორ მუშაობენ მუნიციპალიტეტში

ქობულეთის პლაჟზე, თამარ მეფის #52-ის გასწვრივ, ბეტონის ხიმინჯები ჩამოასხეს, შემდეგ ერთსართულიანი ღია ვერანდა მოაწყვეს და შუშით შეფუთეს. მშენებლობის დასრულების შემდეგ აქ კაფე გახსნეს, რომელიც ახლაც ფუნქციურია.

მერიის ინფორმაციით, უკანონო კაფე ქობულეთის სანაპიროზე ალბერტ ხინიკაძეს ეკუთვნის.

ამ კაფეს ქობულეთის ბულვარში, სასეირნო ბილიკის ნაწილი აქვს დაკავებული.  მშენებელმა კაფეს, რომელიც ტროტუარზე ჰქონდა მოწყობილი, ფაქტობრივად, პლაჟის მხრიდან ვერანდა მიადგა ისე, რომ პლაჟზე ჩასასვლელიც ჩაკეტა.

თამარ მეფის #52 ქობულეთის მერიიდან 10 წუთის სავალზეა. მიუხედავად ამისა, მერიის ზედამხედველობის სამსახურმა უკანონო მშენებლობა ვერ აღკვეთა.

ქობულეთის მერიის პრესსამსახურის ინფორმაციით, უკანონო შენობასთან დაკავშირებით, სადაც კაფე „პაპალო ქობულეთი“ ფუნქციონირებს, მერიის ზედამხედველობის სამსახურმა გამოსცა დადგენილება დემონტაჟის თაობაზე, თუმცა კაფე ჩვეულებრივად აგრძელებს მუშაობას.

პრესსამსახურში განმარტეს, რომ მშენებელმა ზედამხედველობის დადგენილება მერთან ადმინისტრაციული წესით გაასაჩივრა. მერს ჯერ გადაწყვეტილება არ მიუღია.

უკანონო მშენებლობა ამ კაფეს გვერდითაც წამოიწყეს. მერიის ინფორმაციით ამ შემთხვევაში ილია მეგრელიძემ მოაწყო ბეტონის ხიმინჯები და ჩამოასხეს იატაკი, თუმცა ამჯერად მშენებელს სამუშაოების შეჩერება მოუწია. ქობულეთის პრესსამსახურის ინფორმაციით, გამოცემულია დადგენილება დემონტაჟზე, თუმცა დემონტაჟი ჯერ დაწყებული არ არის.

ორივე შემთხვევაში მშენებლებს პლაჟზე ტერიტორია საიჯარო წესით აქვთ აღებული, თუმცა სამშენებლო ნებართვა არ მიუღიათ და პლაჟზე ბეტონის კონსტრუქციის მოწყობა უკანონოდ დაიწყეს.

ქობულეთის პლაჟზე სხვა კაფეებიც არის, თუმცა მათი უმეტესობა აკმაყოფილებს კანონის მოთხოვნას პლაჟზე მშენებლობის მასშტაბის თვალსაზრისით.

არამხოლოდ პლაჟზე, ქობულეთის სანაპიროსთან ახლოს აქტიური სამშენებლო პროცესი მიმდინარეობს. ორსართულიანი საცხოვრებელი სახლების დემონტაჟის ხარჯზე ახალ, მრავალბინიან კორპუსებს აშენებენ.

„ბათუმელებმა“ გასულ კვირას 30-მდე სამშენებლო მოედანი გადაიღო, მათ შორის არც ერთს არ ჰქონდა განთავსებული საინფორმაციო დაფა. არც იქვე მყოფმა კომპანიის წარმომადგენლებმა შეიწუხეს თავი იმისთვის, რომ დასმულ კითხვებზე ეპასუხათ და მოეწოდებინათ მინიმუმ ის ინფორმაცია, რაც კანონით საინფორმაციო დაფაზე უნდა იყოს განთავსებული.