მთავარი,სიახლეები

პუტინი „ვაგნერის“ მეთაურებს შეხვდა და ახალი დაჯგუფების შექმნა განიხილა

29.09.2023 • 789
პუტინი „ვაგნერის“ მეთაურებს შეხვდა და ახალი დაჯგუფების შექმნა განიხილა

რუსული მედიის ცნობით, რუსეთის პრეზიდენტი ვლადიმერ პუტინი შეხვდა „ვაგნერის“ ჯგუფის ხელმძღვანელებს და მათთან მოხალისეთა დანაყოფების ფორმირება განიხილა. მათ  შორის იყო გადამდგარი პოლკოვნიკი ანდრეი ტროშევი.

რუსული სამთავრობო მედიის – „ტასის“ ცნობით, პუტინმა ტროშევს შეახსენა, რომ მათ უკვე განიხილეს უკრაინაში მოხალისე მებრძოლთა ქვედანაყოფების ჩამოყალიბების საკითხი.

„ერთ წელზე მეტი ხნის განმავლობაში იბრძოდით ასეთ დანაყოფში. იცით, როგორ კეთდება ეს“, – უთხრა პუტინმა ტროშევს.

დღეს, 29 სექტემბერს, დიდი ბრიტანეთის თავდაცვის სამინისტროს დაზვერვა წერს, რომ „ვაგნერელები“ უკრაინაში ბრუნდებიან, როგორც ინდივიდუალურად, ასევე ქმნიან მცირე ჯგუფებს, რომლებიც იბრძვიან უკრაინის წინააღმდეგ სხვადასხვა პრორუსულ შენაერთში. არსებული ინფორმაციით, საუბარია რამდენიმე ასეულ ადამიანზე.

ანალიტიკოსები ამბობენ, რომ „ვაგნერელები“ კონცენტრირდნენ დონეცკის ოლქში, ბახმუტის მიმართულებით, სადაც მათ ბრძოლის დიდი გამოცდილება აქვთ.

„ვაგნერმა“ უკრაინაში, საომარ მოქმედებებში მონაწილეობა შეწყვიტა 2023 წლის ივნისში.

„ვაგნერის“ დაჯგუფების დამფუძნებელი, ევგენი პრიგოჟინი, მის მიერვე წამოწყებული წარუმატებელი ამბოხიდან ზუსტად ორი თვის შემდეგ, ოფიციალური ინფორმაციით, ავიაკატასტროფაში დაიღუპა.

_____________

ფოტო: EPA-EFE/MIKHAIL METZEL

გადაბეჭდვის წესი


ასევე: