დღეს, 22 სექტემბერს, დილით, ყირიმში, ოკუპირებულ სევასტოპოლში შავი ზღვის ფლოტის შტაბ-ბინას დაარტყეს. რუსული სამთავრობო მედია „ტასი“ოფიციალურ წყაროებზე დაყრდნობით წერს, რომ შავი ზღვის ფლოტის შტაბ-ბინაზე თავდასხმა უკრაინამ განახორციელა.
მედიის ცნობით, შტაბ-ბინის მიმართულებით სასწრაფო სამედიცინო დახმარების მანქანები მიდიან.
ოკუპირებული სევასტოპოლის ე.წ. გუბერნატორი, მიხეილ რაზვოჟაევი აცხადებს, რომ მოსალოდნელია კიდევ ერთი შეტევა და მოქალაქეებს მოუწოდებს, არ წავიდნენ ქალაქის ცენტრში.
მისი თქმით, ადგილზე რუსეთის საგანგებო სიტუაციების სამინისტროს თანამშრომლები მუშაობენ, ადგილზე მობილიზებულნი არიან მეხანძრეები, რომლებიც ხანძარს აქრობენ.
მოგვიანებით, რუსეთის თავდაცვის სამინისტრომ განაცხადა, რომ რუსეთის საჰაერო თავდაცვის სისტემამ სევასტოპოლზე თავდასხმის მოგერიებისას ხუთი რაკეტა ჩამოაგდო და ფრთოსანი რაკეტით შეტევის შედეგად დაზიანდა შავი ზღვის ფლოტის შტაბ-ბინის ისტორიული შენობა, დაიღუპა ერთი სამხედრო.
უკრაინულ მხარეს ჯერ განცხადება არ გაუკეთებია, თუმცა მანამდე უკრაინის შეიარაღებულმა ძალებმა დაადასტურეს, რომ 20 სექტემბერს, დილით, სევასტოპოლის მახლობლად რუსეთის შავი ზღვის ფლოტის სამეთაურო პუნქტზე წარმატებული სარაკეტო დარტყმა განახორციელეს.
