ბათუმის მერიამ მოქალაქე ნანა ბერიძესთან საქმე უზენაეს სასამართლოშიც წააგო. დავის საგანი „ბილაინის“ [კომპანია „ვიონი საქართველო“] ანტენაა საცხოვრებელი კორპუსის სახურავზე ბათუმში.
მოსარჩელე ნანა ბერიძე ბათუმში, ფარნავაზ მეფის 77- ში ცხოვრობს, ბათუმის მერიის ადმინისტრაციული შენობის მეზობლად. ამ კორპუსის სახურავზეა განთავსებული ანტენა იმის მიუხედავად, რომ მოქალაქემ ქვეყნის ყველა ინსტანციის სასამართლოში დაადასტურა, რომ ბათუმის მერიამ უკანონო გადაწყვეტილება მიიღო.
უზენაესი სასამართლოს გადაწყვეტილების მიღებიდან თითქმის 4 თვე გავიდა. უზენაესი სასამართლოს განჩინება საბოლოოა და არ საჩივრდება.
უზენაესმა სასამართლომ 2023 წლის 5 მაისს დაუშვებლად მიიჩნია ბათუმის მერიისა და კომპანია „ვიონი საქართველოს“ [ბილაინი] საკასაციო საჩივრები და უცვლელი დატოვა ქუთაისის სააპელაციო სასამართლოს მიერ მიღებული განჩინება.
რატომ არ აღასრულა ბათუმის მერიამ ამ დრომდე სასამართლოს გადაწყვეტილება? – ბათუმის მერიისგან დღეს, 29 აგვისტოს, ამ საკითხზე განმარტება ვერ მივიღეთ.
მოქალაქე ნანა ბერიძემ ბათუმის საქალაქო სასამართლოს მას შემდეგ მიმართა, როცა ბათუმის მერიისგან ვერ მიიღო პასუხი კითხვაზე: როგორ დაამონტაჟეს ანტენა კანონიერად, როცა ამ კორპუსში ბინების მესაკუთრეები წინააღმდეგი იყვნენ?
ბათუმის საქალაქო სასამართლომ უკანონოდ მიიჩნია ბათუმის მერიის მიერ გაცემული ნებართვა, რომლითაც ანტენა კორპუსის სახურავზე დაამონტაჟეს. ქუთაისის სააპელაციო სასამართლომ კი, 2022 წლის 21 დეკემბერს ბათუმის საქალაქო სასამართლოს გადაწყვეტილება ძალაში დატოვა.
ბათუმის მერია სასამართლოში ამბობდა, რომ ანტენის კორპუსის სახურავზე განთავსება პირველი კლასის მშენებლობაა და მას ამხანაგობის თანხმობა არ სჭირდებოდა. მოსარჩელის იურისტების განმარტებით, მსგავს ვითარებაში მესაკუთრეების 100-პროცენტიანი თანხმობაა საჭირო.
